Tym i bardhë nga Këshilli Politik!
Palët kanë arritur që të sigurojnë një marrëveshje mbrëmjen e sotme dhe pika e vetme që i ndante ishte depolitizimi i Komisioneve Politike, por që tanimë është gjetur një dakordësi.
Pas arritjes së marrëveshjes ndërkombëtarët kanë dalë në një deklaratë për shtyp.
Ambasadorja amerikane tha se të gjitha palët lëshuan diçka nga vetja për të mirën e Shqipërisë, teksa shtoi se ishte krenare për këtë marrëveshje.
“Jemi shumë të kënaqur që Këshilli Politik mori këtë vendim dhe u bë kjo marrëveshje e rëndësishme. Të gjitha palët kanë dhënë kontributet e tyre, por kanë hequr dorë, e kanë dhënë diçka që Shqipëria të përfitojë. Disa do ta kritikojnë si jo të mjaftueshme këtë marrëveshje, por po ta shikojmë në një kuadër më të gjërë, kjo është një gjë për të cilin të gjithë më pas do japim mbështetjen e tyre. Sa i përket SHBA ne jemi krenarë për këtë marrëveshje do ju mbështësim në rrugën e integrimit europian”,- tha ajo.
Nga ana tjetër, ambasadori i Bashkimit Europian në Tiranë, Luigi Soreca, deklaroi se është bërë një hapë shumë i rëndësishëm, duke theksuar se që në diskutimet e ditës së mërkurë pati një marrëveshje të mirë, por opozita e bashkuar kërkoi të shikonte dhe shqyrtonte më tej disa çështje, si depolitizimi i administratës zgjedhore.
Për ambasadorin Soreca, kjo është një gjë e rëndësishme dhe në përputhje me rekomandimet e OSBE.
“Të mërkurën ne kemi pasur një marrëveshje të mirë, pas disa diskutimeve të mira. Ju e dini që opozita e bashkuar ka kërkuar të shikonte dhe shqyrtonte më tej disa çështje, si depolitizimin e administratës zgjedhore, gjë që është në përputhje me rekomandimet e OSBE. Ne e mbështesim këtë hap të rëndësishëm të arritur. Javën që vjen KE do të propozojë edhe kuadrin negociator. Kështu që tani le të ecim përpara.”, tha Soreca.
Kurse, ambasadori britanik, Duncan Norman ka thënë pas marrëveshjes për Reformën Zgjedhore se palët patën dëshirë për kompromis ndërkohë që të gjitha hoqën dorë nga diçka, teksa shtoi se ky është vetëm fillimi dhe se nëse vijohet kështu atëhere ka shpresë për të ardhmen.
Kjo është një ditë vërtetë e mirë, pas një javë negociatash, Të gjithëve u është dashur që të heqin dorë nga diçka. Marrëveshja u bë e mundur, pasi të gjithë kishin vullnet për të arritur deri në fund. Kjo marrëveshje është shumë e rëndësishme për integrimin e BE dhe për zgjedhjet e ardhshme.
