“Të gjitha rrugët e Ballkanit Perëndimor do të çojnë në Durrës”, Rama entuziast për portin e ri

Sot është prezantuar projekti për portin e ri tregtar që do të ndërtohet në Durrës, pasi qeveria ka vendosur ta kthejë portin ekzistues në një zonë turistike. Kryeministri Edi Rama në fjalën e tij gjatë prezantimit deklaroi se porti i ri tregtar do t’i japë një zhvillim të madh Durrësit. Projekti do të zhvillohet nga kompania holandeze Royal Haskoning dhe pas përfundimit të projektit sipas tij “të gjitha rrugët e Ballkanit Perëndimor do të çojnë në Durrës”, duke vendosur një paralelizëm me shprehjen e vjetër të Perandorisë Romake se të gjitha rrugët të çojnë në Romë.
“Falenderoj të gjithë përfaqësuesit e vendeve të interesuara për këtë projekt. Dua t’i shpreh një falenderim të veçantë, ustait të ardhur përsëri nga Holanda, Erik Oostëegel, i cili për hir të së vërtetës, na ka ndriçuar rrugën me një aftësi të pashembullt që mishëron eksperiencën dhe dijen botërisht të mirënjohur të kompanisë Royal Haskoning.
Kjo na bën të ndihemi të sigurt që thënia e vjetër e Perandorisë Romake se të gjitha rrugët të çojnë në Romë, falë Erikut edhe grupeve të inxhinerëve dhe të analistëve të Royal Haskoning do të bëjë që të gjitha rrugët e Ballkanit Perëndimor të çojnë në Durrës”, theksoi kreu i qeverisë.
Kujtojmë se Porti i Durrësit ekzistues do të kthehet në një zonë rezidenciale dhe do të ndërtohet një marinë jahtesh. Por ekspertë të fushës si dhe opozita ka denoncuar këto projekte të qeverisë, pasi i shohin si jo të arsyeshme dhe kanë aluduar për një aferë të mundshme dhe pastrim parash.