Operacioni Forca e Ligjit ka nisur dy kërkesa të reja me shkrim për deklarim pasurie, ndaj personave të dënuar për krime të rënda.
Në sitën e OFL ka rënë A.K., banues në Durrës, i cili është dënuar në Gjermani për trafik narkotikësh.
Personi i tjetër të cilit i është kërkuar deklarimi i pasurisë, është B.P., banues në Koplik, i dënuar në Belgjikë për trafik të qenieve njerëzore.
Brenda 48 orësh këto subjekte duhet t’u jenë përgjigjur me shkrim të gjitha pyetjeve të OFL-së.
Më pas dosjet e tyre do t’i kalojnë SPAK, e cila ka të drejtë t’i kërkojë Gjykatës Speciale sekuestrimin e pasurive.
Njoftimi i policisë
Vijon Operacioni Forca e Ligjit Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve: – A. K., banues në Durrës, i dënuar në Gjermani për vepra penale në fushën e narkotikëve; – B. P., banues në Koplik, Shkodër, i dënuar në Belgjikë për trafik të qenieve njerëzore; Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së. Më pas, përgjigjet e marra do t’i dërgohen SPAK-ut, i cili brenda jo më shumë se 15 ditësh, duhet të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre. Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit dhe në jo më shumë se 6 muaj Gjykata Speciale duhet të vendosë për konfiskimin përfundimtar të tyre. Theksojmë se të gjithë personat që iu është dërguar kërkesa me shkrim për vetëdeklarimin e burimeve të pasurisë, i kanë plotësuar formularët dhe i kanë dorëzuar të gjithë pranë OFL-së, e cila ka vijuar me procedurat sipas përcaktimit në aktin normativ nr. 1 , të datës 31 janar 2020. OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
Deri më tani, pjesë e listës së OFL kanë qenë emra të njohur për drejtësinë shqiptare, si ish-kreu i bandës së Durrësit, Lulzim Berisha, kunati i tij, Plarent Dervishaj, Suel Çela dhe Ardian Çapja në Elbasan, Dashamir Gjoka në Shijak, Emiljano Hysenaj, Saimir Taullau në Lushnje dhe Ben Qimja në Fier.
Gjithashtu u janë sekuestruar pasuritë, Altin Hajrit dhe grupit të Dukagjinit, të cilët akuzohen për rrëmbimin dhe vrasjen e Jan Prengës.
