Ditën e sotme është dërguar për gjykim në Gjykatën e Posaçme Kundër Krimit dhe Korrupsionit, dosja e Ardian dhe Florenc Çapjes. Sipas informacioneve të marra mësohet se si të pandehur janë thërritur, Klajdi Dokoli, Etjen Cani dhe Olsi Leku.
Gjithashtu, pritet të merret dhe dëshmia e të penduarit të drejtësisë, Ervis Bardhit. Ky i fundit, ka treguar me detaje vrasjen e ndodhur në vitin 2012 në Elbasan, ndaj babë e birë, Nezir dhe Gentian Beqiri.
Mësohet se Olsi Leku, i cili njihet me disa emra, nuk do të ekstradohet nga Greqia, ku është dhe i arrestuar, ndërkohë e njëjta njëjta masë pritet të merret edhe ndaj Floenc Çapjas, i cili aktualisht ndodhet në Dubai.
Kujtojmë këtu se Ardian Çapja dhe Florenc Çapja, akuzohen për ekzekutimin e dyfishtë në Elbasan të babë e bir Gentian dhe Nezir Beqiri ngjarje e ndodhur në 2012. Arrestimi i Ardian Çapjas u bë më 29 mars në Elbasan. Sakaq theksojmë se hetimet për vrasjen e dyfishtë u rihapën në vitin 2018 nga disa të dhëna të mbërritura në Policinë e Shtetit, ndërsa prova më e fortë e Prokurorisë së Elbasanit është dëshmia e E. B., i konsideruar si ekzekutuesi fizik i Gentian Beqirit në apartamentin e tij. I penduari, pasi u zbulua nga shenja e gishtit në targën e makinës së përdorur për vrasjen, zgjodhi të bashkëpunojë me drejtësinë duke treguar detaje. Dëshmia e tij u konsiderua e besueshme nga prokuroria, teksa ai tregoi me detaje mënyrën e vrasjes dhe faktin që ka marr 50 mijë euro për vrasjen. Po ashtu së fundmi dosjes hetimore të Çapjave i është shtuar edhe dëshmia e familjarëve të Gentian dhe Nezir Beqirit, ku janë siguruar prova të forta në ngarkim të tyre. Referuar dosjes hetimore, nëna e Gentianit dhe bashkëshortja e Nezir Beqirit, mësohet të ketë dëshmuar se, shkaktarët për vrasjen e familjarëve të saj janë anëtarët e familjes Çapja, me argumentin se janë e vetmja familje që marrin kërcënime dhe janë në hasmëri. Ndër të tjera ajo mësohet të ketë deklaruar se gjatë kohës që Gentiani ishte në masën e sigurimit “Arrest në shtëpi” si i dyshuar si njëri prej autorëve të vrasjes së Sokol Çapjas, në banesë kanë shkuar shpesh Etjen Cani, Lorenc Skilja, të dy banorë të lagjes “Çlirimi”, Elbasan.
