Dita Ndërkombëtare e Librit është një festë për të promovuar vlerat e librit edhe të të lexuarit. Çdo vit, kjo ditë festohet në të gjithë botën, duke pasur në qendër magjinë e librit, si një urë midis brezave edhe kulturave të ndryshme. Për këtë ministrja e Kulturës, Elva Margariti, flet për nismën e datës 23 prill në Shqipëri, ku çdo pasagjer, që lexon një libër në urban do të udhëtojë falas.
“Para pak kohësh shikonim shumë nga punonjësit tanë të MK-së, që afronin drejt vendit të punës me një libër në dorë, edhe menduam që do të ishte shumë mirë, që kjo të merrte një vlerë tjetër. Prandaj menduam që kjo do të ishte një ndihmë për studentët edhe ne, që t’i bashkonim të gjithë drejtë ditës së librit,” – shprehet ministrja e Kulturës, Elva Margariti.
Një nismë kjo e ndërmarrë nga Ministria e Kulturës dhe Bashkia e Tiranës, “Udhëtoj përmes librit”, jo sepse libri vlen sa një biletë transporti publik, por për t’i nxitur shqiptarët, që të lexojnë më shumë.
“Para pak kohësh, shihja punonjësit e Ministrisë sonë, të cilët afroheshin në Kinostudio me një libër në dorë për të kaluar momentet e tyre në autobus dhe menduam se do të ishte shumë mirë sikur kjo të merrte edhe një vlerë tjetër. Kjo nismë, i drejtohet edhe studentëve, që udhëtojnë çdo ditë drejt universiteteve, edhe si një ndihmë për ta, por edhe për ne për t’i bashkuar të gjithë drejt librit. ” –theksoi Elva Margariti, Ministre e Kulturës.
Në Ditën Botërore të Librit, preken edhe shqetësimet që Shoqata e botuesve ka parashtruar, siç është TVSH-ja, apo mungesa e botimeve për studentët kryesisht, në Bibliotekat e lagjeve apo shkollave. Ministrja e Kulturës, Elva Margariti thotë se është ngritur një grup pune për këtë çështje.
Ndërsa, sa i përket statistikave që tregojnë se numri i lexuesve shqiptarë ka rënë, diçka që ka ndodhur gjatë viteve, Margariti tregon se çfarë është duke bërë ministria e Kulturës për ta shpënë librin më tej.
“Duhet një bashkim edhe më i madh forcash, kjo është e vërtetë, megjithatë filizat e para kanë lindur, edhe ne vazhdojmë që t’i ndjekim. Ka ende akoma shumë punë, të gjithë jeni të mirëpritur që të na mbështesni,” tha ministrja e Kulturës.
Për pasurimin e bibliotekave të shkollave edhe të lagjeve me botime të reja, ajo thotë se:
“Nisma jonë e Edukimit Përmes Leximit vazhdon, vazhdojmë që të dhurojmë libra shumë bibliotekave. Kemi shkuar jo vetëm në bibliotekat e qyteteve, por edhe ato rurale. Kjo nisëm vazhdon, edhe brenda mundësive tona do të vazhdojmë që t’i rifreskojmë. Kuptohet që kush do të dojë që të na bashkohet, të na dhurojë edhe libra të tjerë, ne jemi të gatshëm, që t’i dhurojmë në të gjithë Shqipërinë këta libra”.
Ditën e martë aktivitete të ndryshme do të organizohen në lidhje me këtë ditë.
