Edhe pse Shqipëria ndodhet në një situatë të vështirë ekonomike për shkak të situatës së krijuar nga COVID-19, tenderat nuk kanë të ndalur dhe taksat e shqiptarëve vijojnë të fluturojnë nga buxheti i shtetit.
Më i fundit është tenderi i hapur nga drejtori i RTSH, Thoma Gëllçi, më 21 prill, shkruan “Pamfleti”.
Ky tender ka si objekt: Vendosje paisje e programe, për shtimin e Arkives Numerike në RTSH.
Vlera e tenderit është plot 41 milion lekë të reja me TVSH, ndërsa afati për dorëzimin e ofertave është data 14 maj.
Tenderi është denoncuar edhe nga ish-deputeti i Partisë Demokratike, Ervin Salianji.
Sipas PD, Thoma Gëllçi po shpërdoron 250 mijë euro nga buxheti i shtetit, pasi pajisjet që kërkon të blejë kushtojnë vetëm 50 mijë euro.
Fare mirë këto para mund të ishin përdorur për të mbuluar nevojat mjekësore të COVID-19, të cilat nuk janë të pakta, ose mund të ishin përdorur për të ndihmuar familjet në nevojë, të cilat kanë mbetur pa të ardhura si pasojë e pandemisë.
Për më tepër, më 1 prill, Agjencia e Prokurimeve Publike njoftoi pezullimin e të gjithë tenderave që nuk kanë lidhje me përballimin e situatës së COVID-19 dhe ato që nuk janë të domosdoshme.
Njoftimi i APP
Në vijim të Njoftimeve të deritanishme, mbi shpalljen e procedurave të reja të prokurimit publik, apo vijimin e procedurave apo kontratave në proces, Agjencia e Prokurimit Publik (në vijim “APP”) në mbështetje të nenit 13 të Ligjit Nr. 9643 datë 20.11.2006 “Për prokurimin publik”, të ndryshuar, sjell në vëmendje si më poshtë vijon:
Autoritetet kontraktore duhet të vijojnë procesin e prokurimit vetëm për ato procedura prokurimi që lidhen ngushtësisht me mbulimin e nevojave te dala në kuadër të situatës së shkaktuar nga pandemia Covid 19 dhe që konsiderohen të domosdoshme.
Në kuptim të sa më sipër, autoritetet kontraktore të pezullojnë gjitha procedurat e prokurimit, përfshirë këtu edhe procedurat e prokurimit me vlerë të vogël, për objekte prokurimi të cilat nuk lidhen ngushtësisht me këtë situatë, deri në një njoftim të dytë.
Gjithashtu, të pezullohen edhe ato procedura prokurimi që janë në proces, objektet e të cilave nuk lidhen me situatën e shkaktuar nga pandemia, deri në një njoftim të dytë.
Për këtë qëllim, sjellim në vëmendjen e të gjithë autoriteteve kontraktore dhe operatorëve ekonomikë stafi i APP-së është në dispozicion për çdo kërkesë për asistencë, pyetje apo paqartësi, të cilat mund t’i dërgoni në adresën e-emailit: [email protected].
Nisur edhe nga njoftimi i APP mbetet e paqartë se cila është lidhja e ngushtë mes tenderit të Gëllçit dhe situatës së krijuar nga COVID-19 apo domosdoshmërisë për ta shpallur në një kohë kur vendi po vuan krizën ekonomike të COVID-19 dhe këtë mund te na e shpjegojë vetëm drejtori i RTSH.
