Zëdhënësi i talebanëve, Zabihullah Mujahid ka bërë me dije ditën e sotme se nuk ka një marrëveshje me SHBA-të për një shtyrje të afatit të evakuimeve nga Afganistani, përtej 31 gushtit. Ata duan që të gjitha vendet t’i përfundojnë evakuimet deri në atë datë.
Mujahid tha se turmat e afganëve që mblidheshin në aeroportin e Kabulit duke pritur të largohen jashtë vendit. mund të shkojnë në shtëpi. Ai gjithashtu u bëri thirrje Shteteve të Bashkuara të mos inkurajojnë njerëzit afganë të largohen nga atdheu i tyre.
“Ne garantojmë sigurinë e tyre”, tha ai në një konferencë shtypi, ndërsa shtoi se nuk ka një listë të personave të synuar për hakmarrje, pasi çdo gjë ka mbetur në të shkuarën.
Ai tha se jeta po kthehet në normalitet në vend, por kaosi në aeroport mbetet problem. Shumë afganë janë të dëshpëruar për të ikur që nga marrja nën kontroll e vendit e talebanëve.
Në lidhje me takimin e kreut të talebanëve dhe atij të CIA-s, Mujahid tha se nuk është në dijeni, por ai nuk e mohoi që një takim i tillë të ketë ndodhur.
Ndërkohë, udhëheqësit e Grupit të Shtatë (G7) – Britania, Kanadaja, Franca, Gjermania, Italia, Japonia dhe Shtetet e Bashkuara – pritet të takohen më vonë të martën për të diskutuar krizën.
