Kryeministri i Kosovës, Albin Kurti, foli sot në konferencën “Western Balkans Six – Youth for Social Democracy” për procesin e dialogut me Serbinë, duke u ndalur në takimin e nesërm me presidentin serb Aleksandar Vuçiç që do të mbahet në Bruksel. Kurti theksoi rëndësinë e Marrëveshjes Bazike të 27 shkurtit të vitit të kaluar dhe Aneksit të zbatimit nga Ohri, duke i cilësuar ato si zgjidhjet kryesore për normalizimin e raporteve mes Kosovës dhe Serbisë.
“Të shohim se në çfarë gjendje ndodhemi dhe cilat janë idetë se si mund të ecët para. Për bindjen time, Marrëveshja Bazike me Aneksin e Ohrit e bën normalizimin e raporteve mes Kosovës dhe Serbisë me njohje së paku de-facto në qendër,” tha Kurti. Ai shprehu bindjen se marrëveshja bazike dhe aneksi janë zgjidhja evropiane e fqinjësisë së mirë, një zgjidhje e cila ende nuk është realizuar.
Kurti theksoi se këto dokumente janë kyçe për të ecur përpara dhe për të siguruar një proces të qëndrueshëm të dialogut. Ai shprehu shpresën se takimi i nesërm në Bruksel do të ndihmojë në avancimin e këtyre përpjekjeve drejt një normalizimi të plotë të marrëdhënieve mes dy vendeve.
