Ambasadori gjerman në Shqipëri, Peter Zingraf, ka zhvilluar sot një vizitë pune me Kryetaren aktuale të Gjykatës Kushtetuese dhe Këshillit të Emërimeve në Drejtësi, Vitore Tusha.
Gjatë takimit, ambasadori gjerman vuri theksin në në ngritjen sa më parë të gjykatës Kushtetuese. Ndër të tjera diplomati gjerman e quajti krijimin e Gjykatës Kushtetuese si një kriter të rëndësishëm edhe në lidhje me çështjen se kur do të zhvillohet konferenca ndërqeveritare për negociatat e pranimit në BE.
“Një Gjykatë Kushtetuese funksionale është e një rëndësie qendrore për demokracinë dhe besimin e shqiptareve dhe shqiptarëve në institucionet e tyre. KED-ja luan një rol të rëndësishëm në plotësimin e pozicioneve vakante në Gjykatën Kushtetuese dhe Gjykatën e Lartë. Unë jam mirënjohës për shpjegimet e zonjës Tusha në lidhje me punën e KED-së përgjatë verës, që prej marrjes së funksionit të saj si dhe për hapat e mëtejshëm.
Znj. Tusha solli në vëmendje rëndësinë e opinionit të Komisionit të Venecias për plotësimin e vakancave në Gjykatën Kushtetuese. Unë shpresoj se me plotësimin e vendeve të tjera të rivendoset mundësisht menjëherë funksionaliteti i Gjykatës Kushtetuese. Ky është një kriter i rëndësishëm edhe për çështjen se kur do të zhvillohet konferenca ndërqeveritare për negociatat e pranimit në BE. Gjermania do ta mbështesë Shqipërinë edhe më tej në fushën e reformës në drejtësi”, ka shkruar ambasadori gjerman Zingraf nëpërmjet një postimi në rrjetet sociale.
