Grupi parlamentar i Partisë Socialiste ka mbaruar pushimet dhe menjëherë i është rikthyer punës. Këtë pasdite kreu i këtij grupi, Rama i ka mbledhur anëtarët e Partisë Socialiste në një takim në Elbasan që nisi që në orën 16:00.
Kryeministri Edi Rama dhe në të njëjtën kohë kreu i kësaj partie ndau porositë dhe caktoi drejtuesit politikë në qarqe. Rama i ftoi deputetët socialistë që të reflektojnë dhe të punojnë si skuadër për të marrë mandatin e tretë vitin e ardhshëm.
“Uroj për të gjithë të jeni sa më mirë në këtë periudhë të vështirë dhe ju të jeni kthyer nga pushimet me të gjithë energjinë e nevojshme për të nisur sezonin e fundit të këtij mandati të vështirë dhe sfidues për të gjithë ne. Sezonin e sapo kaluar na u desh të përballemi edhe me një tërmet shkatërrues edhe me një pandemi globale që vazhdon, a thua se nuk na dilnin dhe tepronin sfidat e punës sonë në kthesën e fortë ku e kemi futur Shqipërinë për ta nxjerrë në një lartësi të re.
Tërmeti dhe pandemia janë nga ato ngjarje që tundin tokën. Sot nuk jemi mbledhur për këtë, këtu, jemi mbledhur që t’ju ftoj në një reflektim të thellë por të shpejtë, të cilin sot, dua që ta nisim për ta kryer bashkarisht, së bashku në grupe me të vogla, si do ta vijojmë përpjekjen tonë në cdo drejtim, si skuadër dhe individë dhe si do ta kurorëzojmë këtë mandat me bindjen për të merituar një mandat tjetër, të tretin radhazi, për të parën herë në histori” tha ai.
