Ditën e sotme, Policia e Lushnjës ka arrestuar ish-drejtorin e burgut të Lushnjës, Judmir Shurdhi.
43-vjeçari ishte shpallur në kërkim nga autoritetet pasi Gjykata e Posaçme e ka dënuar me 1 vit e 4 muaj burg për shkelje të barazisë dhe pjesëmarrjes në tendera në bashkëpunim.
“Ky shtetas, në periudhën 2020-2021, gjatë së cilës ka qenë drejtor në burgun e Kosovës, Lushnjë, në bashkëpunim me shtetas të tjerë, ka kryer veprime që përbëjnë shkelje të barazisë së pjesëmarrjes në tendera apo andande publike”, bën të ditur policia.
Theksojmë se hetimi i SPAK ndaj tij dhe disa zyrtarëve të tjerë kishte të bënte me dy tendera, për shërbimin e transportit të punonjësve të rolit bazë dhe të punonjësve me uniformë.
Sipas SPAK, Judmir Shurdhi, në cilësinë e titullarit të autoritetit kontraktor, ka ngarkuar të njëjtët persona të jenë në cilësinë e anëtarit të Njësisë së prokurimit dhe Komisionit të vlerësimit të ofertave, ka miratuar shkeljet ligjore të kryera prej tyre, si në vitin 2018 ashtu edhe në vitin 2019, si dhe ka ushtruar presion ndaj vartësve të tij në vitin 2019 për kualifikimin e operatorit V.K. person fizik.
