Përfaqësuesi i Lartë i Bashkimit Europian, Josep Borrell, ka dorëzuar një raport të rëndësishëm për masat ndaj Kosovës, por përmbajtja e këtij raporti mbetet konfidenciale. Sipas zëdhënësit të BE-së, Peter Stano, diskutimet lidhur me raportin janë të brendshme dhe nuk do të bëhen publike.
“Raporti që Përfaqësuesi i Lartë i dorëzoi shteteve anëtare është një raport për diskutimet e tyre, të cilat janë të brendshme dhe konfidenciale. Ne nuk zbulojmë as përmbajtjen e raportit, as të diskutimeve,” tha Stano, duke nënvizuar natyrën sekrete të dokumentit dhe bisedimeve rreth tij.
Në anën tjetër, zëvendëskryeministri i Kosovës, Besnik Bislimi, ka deklaruar se disa shtete anëtare të BE-së po kërkojnë një mënyrë për të hequr masat ndëshkuese ndaj Kosovës. Ai theksoi se shumica absolute e vendeve besojnë se vendosja e masave ndaj Kosovës ka qenë e padrejtë, ndërsa mos vendosja e masave ndaj Serbisë ka shtuar edhe më shumë padrejtësinë ndaj Kosovës.
“Ne shpresojmë që asnjë vend nuk do të ngrisë zërin që t’i kundërshtojë masat, për arsye se nuk ka pasë asnjë vend që është kundër heqjes së masave. Ka pasë dy-tri shtete që kanë preferuar heqje graduale të masave në dy shkallë, por jo që ka pasë të tillë të cilët kanë qenë kundër heqjes së masave, por shumica absolute e vendeve besojnë se vendosja e masave ndaj Kosovës ka qenë e padrejtë, mos vendosja e masave ndaj Serbisë ka qenë padrejtësia shtesë që i është bërë Kosovës,” tha Bislimi.
