Kryeministri Edi Rama ka reaguar lidhur me heqjen e tabelave dygjyhëshe në Finiq.
Rama thotë se tabelat rrugore në gjuhën greke që u hoqën pak ditë më parë në jug të Shqipërisë, do të vendosen sërish nga nesër, por në përputhje me ligjet dhe kriteret teknike.
Gjatë prezantimit të aplikacionit “Ambasada ime”, Rama tha se tabelat u hoqën pasi ishin jashtë kriterëve dhe se deri të premten do të rivendosen nga ARRSH në bazë të legjislacionit shqiptar. Ai komentoi dhe deklaratat e ndryshme dhe kritikat në drejtim të qeverisë, si dhe marrëveshjen me Greqinë.
“Nesër do të vendosen, dhe deri të premten do të jenë të vendosura të gjitha në përputhje me ligjet dhe kriteret në Shqipëri. Dhe për të gjithë ata që bëjnë patriotin, u them se ne jemi një vend europian, dhe kur flasim për europën flasim edhe për këtë. Kush do të bëjë vota dhe propagandë, le ta bëjë, por kurrë nuk do të arrijë të kthejë mbrapsht rrugën e një tradite që është e shkruar në kanunin tonë”- deklaroi Rama.
“Për ne diplomacia ka pasur dy shtylla. Nga njëra anë nevojën për t’i dhënë një dinamikë të re politikës sonë të jashtme dhe një rol të ri Shqipërisë në rajon dhe nga tjetër për ta bërë shërbimin tonë më eficient për qytetarët tanë.
Qeveria jonë ka filluar dhe ka mbyllur negociatat me 7 vende për pensionet e shqiptarëve që punojnë jashtë vendit dhe ndërkohë po vijojmë negociatat me vendet e tjera duke marrë parasysh dhe vështirësinë.” – ka deklaruar Rama.
