Deputetja e Partisë Demokratike, Jorida Tabaku, është shprehur se falja e gjobave legalizon infomalitetin dhe shkeljen e ligjit.
Tabaku, gjatë emisionit “Debat” në A2 CNN, tha se një amnisti për gjobat do të nxiste qytetarët të shkelin përsëri rregullat, me shpresën se do të ketë një tjetër amnisti kur të afrohen zgjedhjet.
“Në 2022 ka një vendim të Kushtetueses që e ka quajtur atë ligj antikushtetues. Pra ai ligj nuk duhet të kishte ekzistuar dy vitet e fundit, nuk duhet të ishte zbatuar. U kujtuan pas 2 vitesh për të zbatuar një vendim të Kushtetueses për një ligj që e kanë zbatuar për disa inspektoriate dhe më pas tani e falin?
Unë shikoj pjesën problematike atë të faljes së gjobave përsa i përket sigurisë së ushqimit. Unë në fakt jam për një mënyrë ndryshe të të funksionuarit të shtetit, për një sistem që nuk funksionon mbi gjobat. Këta thanë do bëjmë shtet, dhe vendosnin gjoba. Këtu bëhet fjalë që kur ti fillon me konceptin e faljeve, ti e legalizon informalitetin.
Kjo ka qenë arsyeja që unë kam qenë kundër amnistisë fiskale. Në parim unë mendoj se këto gjoba duhet të ishin falur në kohë, atëherë kur u vendosën këto gjoba. Kjo duhet vendosur edhe në një prizëm ligjor dhe shtetformues dhe duhet parë se kush i vendos këto gjoba”, tha Tabaku
