Nënkryetarja e PD-së, Jorida Tabaku gjatë mbledhjes që u mbajt ditën e sotme në Komisionin e Ekonomisë dhe Financave ka paraqitur një sërë shqetësimesh të opozitës në lidhje me borxhin publik.
Tabaku thotë se Shqipëria nuk ka pasur përfitime nga rritja e borxhit dhe sipas saj borxhi është marrë për të paguar pagat e të punësuarve.
“Qeveria e gjeti borxhin në 2013 në vlerën e 6.3 mld euro ndërkohë që në gjashtëmujorin e parë të vitit 2021 borxhi ka kapur vlerën e 10.29 mld euro. Nga një rritje e tillë e borxhit çfarë ka përfituar ekonomia shqiptare?! Dukshëm asgjë!”, u shpreh Tabaku.
Më tej Tabaku ka shtuar se situata në tregjet botërore dhe situata ekonomike globale do të ndikojë negativisht në normën e interesit për Eurobondin.
“Po merret borxh për paga, pensione dhe koncesione që nuk ka ndodhur kurrë më parë. Borxhi ka arritur ne 95% te PBB!”, tha ajo.
Tabaku shtoi se Shqipëria është e përfshirë në listën gri të Moneyval dhe kjo sipas saj do të ndikojë drejtpërdrejtë në rezultatet e Eurobondit.
“Nuk duhet harruar, shtoi ajo, se Shqipëria është një nga vendet e përfshira në listën gri të Moneyval. Kjo do të ndikojë në rezultatin e nxjerrjes së Eurobondit në treg”, ka thënë Tabaku.
