Kandidatja e Partisë Demokratike në Tiranë, Jorida Tabaku ka qenë e ftuar në emisionin “Refleksione” në Abc News, ku ka ngritur akuza ndaj qeverisë se punon për një grup njerëzish. Tabaku ka thënë se në 4 vitet e fundit të paktën 7 ligje kanë emra biznesesh, por se cilët janë këta emra ajo nuk e thotë.
“Sot jemi në nivelin e kapjes së shtetit. Sot jemi në nivelin ku parlamenti punon për një grup njerëzish. Ku të paktën në 4 vitet e fundit 7 ligje kanë emra biznesesh. Ku biznesmenë fatkeqësisht nxjerrin dhe fusin bizneset në skema TVSH-je financiare për të pasur përfitime të tyre personale dhe kjo është një formë korrupsioni në kapje të shtetit që nuk e ka asnjë vend tjetër ne botë. Parlamenti është thjesht në terr”, tha Tabaku.
Sa herë PD denoncon kapjen e shtetit nga një grusht njerëzish, emri i përgjithshëm është vetëm “oligarkët”, të cilët për demokratët nuk kanë emra konkretë. Si kryetari i kësaj force politike, Lulzim Basha që nuk “di” asnjë emër kur flet për oligarkët, ashtu nuk dinë edhe kandidatët e PD.
Është e pamohueshme që shteti është i kapur nga oligarkët, por sa kohë Partia Demokratike nuk ka guxim të përmendë emrat e tyre, nuk do të ketë ndonjë ndryshim nëse ata vijnë në pushtet. PD flet për shembjen e Teatrit, por nuk e thotë se një ligj i posaçëm u bë në mënyrë që Shkëlqim Fusha të ndërtojë aty 6 kulla. PD flet për uljen e taksave për oligarkët, por nuk e përmend faktin se qeveria hoqi këtë vit renëtn minerare duke favorizuar Samir Manen në blerjen dhe shitjen e kromit.
Der’ sa PD të flasi me emra na mbetet vetëm të “shfrenojmë” imagjinatën e të mendojmë se për kë e ka fjalën, sepse ndoshta për PD-në oligarkët nuk kanë të njëjtët emra me ata që njohim ne, ose janë thjesht anonim që kanë zaptuar pasurinë.
