Deputetja e Partisë Demokratike, Jorida Tabaku është shprehur sot në Komisionin e Ekonomisë dhe Financave se buxheti i parashikuar nga qeveria për vitin 2024, është më shumë në kurriz të qytetarëve shqiptarë.
Sipas saj populli do të paguajë më shumë taksa dhe do të rritet korrupsioni. Tabaku thekson se tre fushat kryesore se ku do të shkojnë shpenzimet e buxhetit do të jenë koncensionet, faturat e Arbitrazhit dhe Porti i Durrësit.
“A është buxheti i shtetit në funksion të qytetarëve? Tre janë fushat kryesore ku shkojnë shpenzimet më të mëdha. Së pari, koncesionet. 9% nga viti që janë 143 mln euro plus 6 kontrata të tjera që pritet të nënshkruhen me vlerë pothuajse 350 mln euro. Së dyti, nga 379 mln euro nga faturat e Arbitrazhit qeveria fillon dhe paguan 200 mln euro nga buxheti i shtetit. Të gjtiha detyrime si pasojë e arrogancës dhe gjyqeve të humbura. Dhe së treti, Porti i ri i Durrësit. Me një procedurë joligjore, korruptive qeveria shqiptare e dha me koncesion portin aktual për të investuar në një port të ri që shkon 400 mln euro. Qartësisht, buxheti nuk është në mënyrë absolute në funksion të qytetarëve”, argumentoi Tabaku.
