33-vjeçarja Svetlana Timofoeva, me pasaportë ruse, Mikhail Zorin 23-vjeç me pasaportë ruse, dhe një tjetër i ri me pasaportë ukrainase janë arrestuar nga autoritetet shqiptare mbrëmjen e së shtunës pas një incidenti në Uzinën e Përpunimit të Armëve në Gramsh.
Ata i kanë thënë policisë se ishin fotografë dhe se kishin faqe blog ku reklamonin kryesisht foto dhe video të ish- bazave ushtarake të Bashkimit Sovjetik.
Ndërkohë që mësohet nga New24 se dy rusët dhe shtetasi ukrainas nuk kanë qëndruar dhe fjetur gjatë tre ditëve në asnjë hotel në Gramsh, por kanë fjetur dhe kanë qëndruar në kodër lart uzinës së Çekinit, ku ndodhet një ish-repart ushtarak i braktisur, i cili më parë ka qenë kundërajrori për mbrojtjen e uzinës.
Vlen të theksojmë se ky vendqëndrim i tyre përforcon dyshimet se kanë vëzhguar me detaje uzinën e Çekinit gjatë këtyre tre ditëve dhe kanë qëndruar pranë saj në një vend ku nuk ishin të ekspozuar dhe kishin mundësi të afroheshin te uzina e Çekinit.
Kujtojmë që 2 rusët dhe ukrainasi kanë sulmuar 2 oficerë roje të Forcave të Armatosura.
“Turistët” kanë tentuar të hynë me dhunë në ambientet e Uzinës së Armëve në Gramsh, por kanë hasur në kundërshtinë e ushtarëve.
Të huajt dyshohet se mund të jenë informatorë të inteligjencës ruse, por ende po hetohet për zbardhjen e ngjarjes.
