Një helikopter që mbante Presidentin e Kolumbisë Ivan Duque dhe zyrtarë të tjerë u godit nga plumbat e shumtë në një sulm të premten. Ka qenë vetë Duque që e ka bërë të ditur incidentin me anë të një vdeio-mesazhi.
Incidenti ndodhi ndërsa helikopteri i presidentit po fluturonte përmes rajonit Catatumbo të Kolumbisë drejt qytetit të Cucuta, kryeqyteti i provincës Norte de Santander të vendit.
“Ajo që është e qartë është se ky është një sulm frikacak ku vrimat e plumbave mund të shihen në avionin presidencial”, tha Duque.
Veç presidentit, helikopteri mbante zyrtarë të tjerë duke përfshirë ministrin e Mbrojtjes Diego Molano, Ministrin e Brendshëm Daniel Palacios dhe guvernatorin e Norte de Santander Silvano Serrano.
Askush nuk u lëndua në incident, tha një zëdhënës i presidencës. Personelit të sigurisë u janë dhënë udhëzime të qarta për të gjetur ata që qëndrojnë pas sulmit në helikopter, bën me dije Reuters.
Rajoni i trazuar Catatumbo, në kufirin e Kolumbisë me Venezuelën, është shtëpia e të mbjellave të gjera të koka-s, përbërësi kryesor i kokainës. Është vendi ku veprojnë guerilët e Ushtrisë së Çlirimit Kombëtar të majtë (ELN), ish luftëtarë të FARC-së që hodhën poshtë një marrëveshje paqeje me qeverinë 2016, së bashku me grupet e armatosura kriminale të përfshira në trafikun e drogës.
