Një ngjarje e rëndë dhe tronditëse ka goditur futbollin shqiptar dhe qytetin e Korçës. Sulmuesi egjiptian i Skënderbeut, 26-vjeçari Saleh Salem, është dhunuar brutalisht dje në lagjen nr. 16 të Korçës nga një grup të rinjsh, në një akt që, për nga ashpërsia dhe mënyra e kryerjes, ka ngritur dyshime edhe për motive raciste.
Sipas Policisë së Korçës, dy prej autorëve, V. J. dhe Th. V., të dy 24 vjeç dhe banues në fshatin Polenë, u arrestuan menjëherë pas ngjarjes. Ata dyshohet se e kanë goditur disa herë në kokë futbollistin, duke i shkaktuar plagë të rënda dhe duke rrezikuar seriozisht shëndetin e tij. Tre persona të tjerë, Th. V., 32 vjeç, nga Polenë, A. Xh., 23 vjeç, nga Bulgareci, dhe J. O., 24 vjeç, nga Rëmbeci, u proceduan penalisht për “Plagosje të rëndë me dashje” në bashkëpunim, pasi dyshohet se kanë qenë pjesë e grupit agresor.
Ndërkohë, një tjetër person, Dh. M., 25 vjeç, nga Rëmbeci, u procedua për “moskallëzim krimi”, pasi ndodhej në vendngjarje, por nuk njoftoi autoritetet.
Dëshmitarë në zonë thanë se gjithçka ndodhi me shpejtësi, ndërsa viktima u rrëzua përtokë nga goditjet e pandalshme. Për fat, ndërhyrja e menjëhershme e të pranishmëve bëri të mundur shmangien e pasojave fatale. Salem u dërgua me urgjencë në spital, ku ndodhet nën kujdesin e mjekëve dhe jashtë rrezikut për jetën, por me dëmtime serioze në kokë dhe trup.
Motivet e sulmit mbeten ende të paqarta. Policia nuk përjashton asnjë pistë, ndër to edhe mundësinë që ngjarja të ketë pasur prapavijë raciste, duke qenë se lojtari është një nga të paktët futbollistë të huaj me origjinë nga Afrika të aktivizuar në Kategorinë Superiore.
Materialet i janë referuar Prokurorisë së Korçës, ndërsa hetimet po vijojnë për të zbardhur plotësisht rrethanat e kësaj ngjarjeje të rëndë, që ka tronditur komunitetin sportiv dhe opinionin publik.
