Tre nga të plagosurit në sulmin ku mbeti i vrarë italiani Alessandro Parini janë ende të shtruar në spitalin në Tel Aviv. Mediat e huaja raportojnë se gjendja e pacientëve nuk konsiderohet e rëndë.
Mësohet se Roberto Niccolai është një nga tre italianët që u plagosën mbrëmë në bregdetin e Tel Avivit pasi një makinë goditi njerëzit që po kalonin.
Ministri i Jashtëm Antonio Tajani saktësoi se Parini dhe turistët italianë të plagosur ishin pjesë e dy grupeve të ndryshme. Ndër të tjera ai njoftoi se grupi i italianëve të përfshirë në sulmin e mbrëmshëm në Tel Aviv, ku mbeti i vrarë 35-vjeçari Alessandro Parini, do të kthehet sot në Itali.
Një person është vrarë dhe 7 të tjerë janë plagosur në një sulm terrorist në Tel Aviv të Izraelit, gjatë mbrëmjes së djeshme. Një makinë u përplas me një grup njerëzish pranë një parku përpara se të rrokullisej. Shërbimet e kërkim-shpëtimit deklaruan se një 30-vjeçar mbeti i vdekur, ndërsa katër persona të tjerë të plagosur, të cilët janë duke marrë ndihmë mjekësore. Autori ende nuk është identifikuar.
Ky ishte sulmi i dytë vdekjeprurës të premten, pasi dy motra u vranë kur makina e tyre u qëllua në Bregun Perëndimor. Zyra e Jashtme e Britanisë tha se ata ishin shtetas britanikë.
Sulmi vjen në sfondin e tensioneve të rritura pas sulmeve ajrore izraelite mbi objektivat militantë palestinezë si në Liban ashtu edhe në Gaza.
Viktima ishte një turist italian që kishte mbërritur vetëm dje në Tel Aviv, së bashku me miq të tjerë të tij.
“Kryeministrja Giorgia Meloni shpreh ngushëllimet e thella për vdekjen e një prej bashkatdhetarëve tanë, Alessandro Parini, në sulmin terrorist të ndodhur në mbrëmje në Tel Aviv”, thanë nga zyra e kryeministres italiane.
