Qeveria kolumbiane po ofron një shpërblim prej gati 800,000 dollarë për informacionin që çon në kapjen e atyre që qëndrojnë pas një sulmi në helikopterin që mbante Presidentin Ivan Duque pranë kufirit të Venezuelës të premten.
Helikopteri po i afrohej aeroportit të Cucuta në një fluturim nga Sardinata kur disa të shtëna me armë zjarri u drejtuan ndaj tij, shkruan Al Jazeera.
Duque po fluturonte me ministrin e mbrojtjes Diego Molano, ministrin e brendshëm Daniel Palacios dhe zyrtarë të tjerë në atë kohë. Askush në bord nuk u lëndua, por fotot e publikuara nga zyra e presidentit treguan se bishti dhe tehu kryesor ishin goditur.
“Një shpërblim deri në 3 miliardë pesos kolumbiane [796,000 $] po ofrohet për informacionin që çon tek ata që janë përgjegjës për këtë sulm terrorist“, tha Molano të shtunën në një video të postuar në mediat sociale, ndërsa bëri thirrje për mposhtjen e terrorizmit.
Gjenerali Jorge Vargas, shefi i policisë kombëtare, tha se një ekip kërkimi i dërguar në një lagje aty pranë Cucuta gjeti një armë AK-47 dhe një kalibër 7.62 që mbanin shenjën e forcave të armatosura të Venezuelës.
Duque ka akuzuar vazhdimisht udhëheqësin socialist të Venezuelës, Nicolas Maduro, për strehimin e disidentëve kolumbianë dhe luftëtarëve rebelë të armatosur. Bogota dhe Caracas ndërprenë marrëdhëniet diplomatike pak pasi Duque, një konservator, erdhi në pushtet në vitin 2018.
