Gjatë natës është sulmuar me granatë dore ndërtesa e komunës së Mitrovicës së Veriut. Policia e Kosovës ka njoftuar se janë shkaktuar disa dëme materiale në dy makina zyrtare. Ndërkohë që ka ardhur një reagim nga kryeministri i Kosovës, Albin Kurti ka reaguar pas sulmit të mbrëmëshëm ndaj ndërtesës së komunës së Mitrovicës së Veriut. Me anë të një deklarate zyrtare Kurti i bën thirrje Serbisë që t’i ndërpresë nxitjet e dhunës “para se të ketë jetë të humbura”.
“Mbrëmë ndërtesa e komunës së Mitrovicës së Veriut është sulmuar me dy granata dore, duke shkaktuar dëme te veturat afër. Fatmirësisht, asnjë person nuk është lënduar, por mund të kishte ndodhur lehtësisht. I bëj thirrje Serbisë që menjëherë të ndërprerë nxitjet e dhunës para se të ketë jetë të humbura”, ka shkruar Kurti.
Policia i ka thënë Radios Evropa e Lirë se në konsultim me prokurorin kompetent është iniciuar rasti “kryerja e veprës terroriste”.
Ditë më parë është raportuar edhe për sulme me shok-bomba afër stacioneve policore në Mitrovicë të Veriut dhe Zveçan, komuna në veri të Kosovës. Tensionet atje janë rritur prej 26 majit, kur kryetarët e rinj shqiptarë të komunave në veri – të banuara me shumicë serbe – kanë hyrë në ndërtesat komunale të Zveçanit, Leposaviqit dhe Zubin Potokut.
