Ditën e djeshme disa sulme kamikaze të njëpasnjëshme ndodhën jashtë aeroportit të Kabulit, ku për pasojë humbën jetën shumë persona. Ditën e sotme ambasada amerikane në Tiranë ka ulur flamurin në gjysmë shtizë në nder të viktimave.
Me anë të një reagimi në rrjetet sociale ambasada e Shteteve të Bashkuara të Amerikës, ka shkruar se ata vajtojnë për ushtarët amerikanë që u safrifikuan për të mbrojtur qytetarët si dhe për viktimat në radhët e popullit afgan, ku kishte dhe fëmijë.
Ndërsa ka shtuar se grupi i parë i qytetarëve afganë të cilët mbërritën mbrëmë në Tiranë janë më shumë se sa njerëz të evakuuar, sipas ambasadës ata janë jetë njerëzore të shpëtuara nga mundësia e pasojave tragjike. Me anë të këtij postimi Ambasada e SHBA-ve ka falenderuar Shqipërinë.
“Sot, flamuri në Ambasadë është i ulur në gjysmë shtizë, teksa vajtojmë amerikanët e ekipit të shërbimit, të cilët humbën jetët e tyre në sulmin e tmerrshëm terrorist në Kabul, ndërsa me vetëmohim përpiqeshin të shpëtonin jetët e të tjerëve. Ne vajtojmë edhe për afganët, përfshirë fëmijët e vegjël, të cilët humbën jetën apo u plagosën në këtë sulm mizor. Zemrat tona ndiejnë dhimbje për jetët e heronjve tanë, të humbura në shërbim të lirisë dhe në shërbim të Amerikës, dhe për jetët e qytetarëve afganë, të humbura në kërkim të sigurisë dhe një të ardhmeje për të cilën të gjithë kemi të drejtë. Prandaj sot zemrat tona janë të mbushura me hidhërim, por ato janë të mbushura edhe me mirënjohje. Grupi i parë i qytetarëve afganë të cilët mbërritën mbrëmë në Tiranë, janë më shumë sesa njerëz të evakuuar. Ata janë jetë njerëzore të shpëtuara nga mundësia e pasojave tragjike. Ata janë gra, burra dhe fëmijë të cilëve u është ofruar diçka që ne e marrim të mirëqenë, një jetë. Mundësia për të jetuar dhe për të pasur një të ardhme. Dhe për këtë, ne si Ambasada Amerikane në Tiranë dhe Shtetet e Bashkuara, jemi mirënjohës për bujarinë dhe mikpritjen e pamasë të Shqipërisë dhe njerëzve të saj. Në kohë të tilla, ne nuk kemi kombësi, fe, ngjyra apo raca. Ne jemi qënie njerëzore që u shtrijmë dorën në ndihmë qenieve njerëzore si ne. Faleminderit Shqipëri!”, thuhet në reagimin e ambasadës amerikane.
