Të paktën 10 persona humbën jetën dhe rreth 200 të tjerë u plagosën pas një serie sulmesh me raketa të lëshuara nga Irani ndaj qyteteve izraelite gjatë natës së kaluar.
Sipas mediave vendase, Irani ka goditur me mbi 100 raketa zonat e Jerusalemit dhe Haifës, ndërsa mes viktimave ndodhet edhe një fëmijë 10-vjeçar.
Katër persona humbën jetën në një sulm në veri të Izraelit, ndërsa gjashtë të tjerë mbetën të vdekur në një ndërtesë në Bat Yam, që u godit drejtpërdrejt.
Për momentin, shërbimet e emergjencës janë ende në kërkim të 20 personave të zhdukur nën rrënoja.
Këto sulme të koordinuara nga Irani vijnë si kundërpërgjigje për një seri goditjesh ajrore që Izraeli ndërmori mbi objektiva ushtarake dhe bërthamore në qytete të ndryshme iraniane, ku sipas raporteve, u eliminuan zyrtarë të lartë ushtarakë dhe shkencëtarë të përfshirë në programin bërthamor.
Forcat e Mbrojtjes së Izraelit konfirmuan se gjatë natës kanë rrëzuar shtatë dronë të nisur nga Irani, falë ndërhyrjes së Forcave Ajrore dhe Marinës.
Po ashtu, në një kundërpërgjigje të menjëhershme, avionët izraelitë kanë goditur disa objekte dhe depo raketash në Iranin perëndimor.
Ndërkohë, rebelët Houthi në Jemen kanë deklaruar pjesëmarrjen e tyre në operacion, duke pohuar se kanë lëshuar disa raketa në drejtim të Izraelit gjatë 24 orëve të fundit, në bashkëpunim të ngushtë me Iranin.
Në Teheran, një nga sulmet izraelite ka shkaktuar një zjarr masiv në dy depo karburanti, ndërsa është raportuar edhe për dëme në ndërtesën e Ministrisë së Mbrojtjes.
Nga ana tjetër, presidenti amerikan Donald Trump ka mohuar çdo përfshirje të SHBA-së në goditjet ndaj Iranit, por paralajmëroi ashpër Teheranin se çdo sulm ndaj bazave amerikane në Lindjen e Mesme do të përballet me “fuqinë e plotë të ushtrisë amerikane”.
Irani ka akuzuar më herët Uashingtonin se ka bashkëpunuar me Izraelin në këtë ofensivë.
