Autoritetet evropiane kanë thyer një tjetër aplikacion komunikimi të përdorur nga krimi i organizuar.
Një ekip i përbashkët hetimor (JIT) që përfshin autoritetet franceze dhe holandeze ka çmontuar platformën e koduar MATRIX, e cila nuk është e panjohur për autoritetet shqiptare.
Në vitin 2022, Nuredin Dumani, i penduari i drejtësisë dhe vrasësi me pagesë, përmendi këtë aplikacion gjatë dëshmisë së tij pas arrestimit. Dumani shpjegoi se kishte komunikuar me Suel Çelën në MATRIX, ku ky i fundit i dha kontaktin e një mikut të tij që kërkonte vrasjen e pronarit të një shkolle në Tiranë.
Në dëshminë e tij, Dumani tregoi detaje të planifikimit të atentatit, ku i interesuari i kishte dërguar fotografi të pronarit të shkollës Wilson, përfshirë pamje të garazhit dhe familjes së tij.
Fillimisht, Dumani kërkoi 200,000 euro për ekzekutimin e vrasjes, por u ra dakord për shumën prej 150,000 euro. Për realizimin e atentatit, ai kontaktuan Henrik Hoxhaj (Rikun) dhe shokun e tij, nipçen, përmes MATRIX. Dumani i dha Rikut fotografinë e viktimës dhe informacion për ambientet ku ai lëvizte.
Përmes këtij aplikacioni, Dumani u informua gjithashtu se Riku dhe nipçja kishin organizuar vrasjen, duke ndjekur dhe vëzhguar lëvizjet e viktimës, dhe përdorën mjete të ndryshme, përfshirë makina dhe armë, për të realizuar atentatin.
Gjatë komunikimit në MATRIX, Riku i raportoi Dumanit për dështimin e atentatit, duke e njoftuar për pengesat që kishin hasur gjatë ngjarjes.
Dumani tregoi gjithashtu për pagesën e një kapari prej 10,000 euro për ekzekutimin e planit, ku u tha se kjo shumë u mor nga Riku pas dështimit të atentatit. Pavarësisht se vrasja nuk u realizua, shumën prej 10,000 euro nuk e kthyen.
Ky detaj është pjesë e një sërë dëshmish që tregojnë përdorimin e aplikacioneve të koduara si MATRIX për organizimin dhe realizimin e krimeve të rënda, duke pasur si pasojë një rrjet të gjerë kriminelësh të lidhur me këtë teknologji të avancuar për mbrojtjen e aktiviteteve të tyre ilegale.
