Sudani, shtet në verilindje të Afrikës, ka njohur zyrtarisht pavarësinë e Kosovës, njoftoi të shtunën presidentja Vjosa Osmani. Përmes një deklarate në platformën X, Osmani bëri të ditur se dy vendet janë pajtuar të vendosin marrëdhënie diplomatike.
“Ky është fillimi i një partneriteti madhështor,” shkroi ajo.
Vendimi i Sudanit vjen menjëherë pas njohjes nga Kenia në fund të muajit mars, duke shënuar njohjen e dytë për Kosovën brenda një jave. Në një video të shpërndarë nga Forumi i Diplomacisë në Antalia të Turqisë, Osmani konfirmoi se ishte ministri i Jashtëm i Sudanit, Ali Yousuf al-Sharif, ai që e njoftoi për vendimin e presidentit sudanez për njohjen e shtetit të Kosovës dhe për vendosjen e marrëdhënieve dypalëshe.
Këto zhvillime përbëjnë një hap të rëndësishëm diplomatik për Kosovën, pas një periudhe me ritëm të ulët të njohjeve në vitet e fundit. Para Kenias dhe Sudanit, njohja më e fundit ishte ajo nga Izraeli në vitin 2021.
Me këtë vendim, Sudani bëhet shteti i 119-të që njeh pavarësinë e Kosovës – një lëvizje që pritet të shkaktojë reagime të ashpra nga Serbia, e cila vazhdon të kundërshtojë fuqishëm pavarësinë e Kosovës.
Serbia ka dënuar më herët edhe vendimin e Kenias për njohje, duke paralajmëruar se ky hap mund të ndikojë në marrëdhëniet mes Beogradit dhe shteteve afrikane që e mbështesin pavarësinë e Kosovës.
