Ditën e djeshme stuhia Ciara mbërtheu Britaninë e Madhe, duke shkaktuar përmbytje dhe bllokimin e qarkullimit për disa orë.
Shpejtësia më e lartë e erës së regjistruar ishte 150 kilometra në orë në fshatin veriperëndimor Uells të Aberdaron.
Ditën e sotme Ciara ka lënë Mbretërinë e Bashkuar dhe ka goditur vende të tjera të Europër, duke u përhapur me shpejtësi në kontinent.
Bëhet me dije se qindra fluturime dhe udhëtime me tren janë anuluar në Evropën veri-perëndimore.
Po ashtu, mijëra shtëpi në Irlandë, Britani e Madhe dhe Francë janë përmbytur, teksa era ka arritur shpejtësinë 130 deri në 160 kilometra në orë në Francë dhe Gjermani dhe pritet që të shkojë deri në 200 kilometra në orë.
Zyrën e Meteorologjisë në Britaninë e Madhe ka paralajmëruar erëra të forta, shi të dendur dhe borë, duke paralajmëruar marrjen e masave.
Stuhia ishte aq e dhunshme sa “ne jemi të detyruar të ndalojmë plotësisht trafikun e planifikuar të trenave në Gjermani këtë të Dielë në mbrëmje,” tha zëdhënësi i Deutsche Bahn, Achim Stauss.
Bëhet me dije se disa aeroporte në Gjermani duhej të anulonin fluturimet kur stuhia goditi veriun: Frankfurti, Berlini, Mynihu, Këlni dhe Hanoveri ishin ndër të prekurit, ndërsa 120 fluturime u anuluan në Dusseldorf të Dielën.
Në 42 rajone të Francës është dhënë nga autoritetet alarmi portokalli ndërsa gati 130 mijë banesa kanë mbetur pa energji elektrike, teksa mbrëmjen e sotme, stuhia pritet të godasë Korsikën me erëra që llogaritet të mbërrijnë në gati 200 km në orë.
Nga stuhia ka patur edhe një viktimë, ku një 58-vjeçar në Britani ka humbur jetën për shkak se një pemë iu rrëzua mbi makinë.
Po ashtu, pritet që Ciara të mbërrijë në vendin tonë ditën e mërkurë, ndërsa duke nisur nga dita e nesërme moti do përkeqësohet.
