Policia e Durrësit ka goditur një tjetër rast të shfrytëzimit për prostitucion në kuadër të operacionit të koduar “Storm 3” (Stuhia 3), duke vënë në shënjestër një rrjet të organizuar me shtetasi kineze.
Dy gra me origjinë nga Kina, përkatësisht R. W., 54 vjeçe dhe X. X., 41 vjeçe, janë proceduar penalisht pasi dyshohet se ushtronin prostitucion në një banesë të marrë me qira në lagjen nr. 13 të plazhit në Durrës.
Sipas hetimeve, ambienti ishte përshtatur posaçërisht për këtë veprimtari të paligjshme.
Në të njëjtin operacion, janë proceduar edhe gjashtë shtetas të tjerë nga Durrësi dhe Kruja, të cilët u kapën në ambientin ku kryhej aktiviteti.
Gjatë kontrollit, policia sekuestroi dy pasaportat e shtetaseve kineze, një shumë prej 86 mijë lekësh, 440 euro, tre telefona celularë, karta telefoni dhe karta bankare.
Hetimet e deritanishme zbulojnë se pas këtij aktiviteti qëndron një grup i strukturuar kriminal me përbërje kinezësh, të cilët rekrutojnë vajza në vendin e tyre të origjinës dhe më pas i sjellin në Shqipëri për t’i përfshirë në rrjetin e prostitucionit.
Grupet kriminale sigurojnë për to apartamente me qira dhe klientë, përmes faqeve të ndryshme online.
Policia njofton se, në bashkëpunim me Prokurorinë, vijojnë hetimet për identifikimin dhe arrestimin e pjesëtarëve të tjerë të përfshirë në këtë rrjet.
