Mesa duket protestat e studentëve do të rikthehen përsëri. Të paktën kjo nënkuptohet në lajmërimin e fundit të ardhur nga lëvizja “Për Universitetin”.
Nëpërmjet një postimi në rrjetin social, Facebook, kjo lëvizje kasë kërkesat që studentët kanë parashtruar nuk janë plotësuar.
Në njoftimin e tyre thuhet se në vend që të përgjysmoheshin, tarifat janë rritur. Ata thonë se tarifa e masterit është rritur me 40 mijë të reja, ndërkohë që përsa i përket bursave të studentëve të ekselencës, e cila shkon rreth 10 mijë lekë të reja, ende nuk është marrë dhe kjo përbën edhe shkeljet më flagrante të premtimeve të marra.
Në fund të postimit thuhet se të ndodhur në këto kushte, studentët do kërkojnë me intensitet edhe një herë riorganizimin e studentëve për të nisur një zinxhir protestash masive.
Postimi i plotë:
Gjatë takimit propagandistik të radhës, kryeministri Rama u kujtoi studentëve se si qeveria nuk ka ndër mend t’u japë zgjidhje problemeve të tyre.
- Në vend të uljes së tarifave në të gjitha nivelet, ai propozoi investime imagjinare në universitete. Pa plan, pa shifra e pa afate.
- Në vend të demokratizimit të universiteteve duke u dhënë fuqi të barabartë studentëve dhe pedagogëve, ai ripohoi pushtetin e bordeve të kontrolluara nga qeveria.
- Në vend të fuqizimit të studentëve në kontrollin e pedagogëve abuzues – nga mitmarrja e shitja e detyruar e librave te plagjiaturat – ai premtoi se do të fusë ruspën shtetërore në universitet. Jo për të ndryshuar situatën, por për të zëvendësuar bajraktarët që nuk kontrollon me bajraktarë të bindur.
- Në vend të rritjes së buxhetit të shtetit për universitetet publike, ai u kërkoi këtyre të fundit të themelojnë firma tregtare për të mbuluar vështirësitë financiare.
- Në vend të rrëzimit të ligjit klientelist të arsimit të lartë, ai la të kuptohet se pronarët e diplomoreve private do të vazhdojnë të fusin duart në buxhetin e varfër të universiteteve publike.
Në këto kushte, studentëve nuk u mbetet veçse të vazhdojnë me më shumë këmbëngulje dhe intensitet procesin e riorganizimit në bazë fakulteti për të nisur së shpejti një zinxhir protestash masive. Kjo qeveri dhe ky sistem politik marrin vesh vetëm gjuhën e fuqisë dërrmuese të shumësisë studentore dhe qytetare.
