Protesta e studentëve vazhdon edhe mbrëmjen e sotme si përballë Ministrisë së Arsimit ashtu edhe para kryeministrisë. Të vendosur për ta vazhduar protestën ata nuk ndalen edhe para të ftohtit, por kanë arritur që të gjejnë mjete alternative për t’u ngrohur, siç është ndezja e një zjarri me letra dhe kartona.
Nga kryeministria një mbështetës i studentëve për News24 thotë se do të shkonte pranë banësës së tij për të marrë dru dhe për t’jua sjellë studentëve që të ndezin zjarrin dhe të qëndrojë ngrohtë gjatë natës. Edhe ditën e sotme studentët kanë vendosur që të qëndrojnë gjatë gjithë natës para dy institucioneve dhe mos të largohen.
“Në do të qëndrojmë këtu, ata që mundemi, por ne nuk lëvizim”, ka thënë një nga studentët.
Pranë studentëve janë edhe shumë qytetarë të cilët kanë sjellë ushqime, batanije, çaj dhe ushqime të tjera. Studentët momentalisht janë duke u mbështjellë me batanije për t’i përballuar temperaturave të ulta dhe të vendosur për të qëndruar deri në momentin që do të plotësohen gjithë kërkesat e tyre.
Protesta ndodhet në ditën e saj të tetë dhe studentët janë më të vendosur se kurrë që të vazhdojnë protestën deri në plotësimin e tetë pikave të tyre.
