Studentët këmbëngulin me idenë e tyre për të vijuar protestën deri në zgjidhjen e 8 kërkesave, ndërsa nga ana tjetër kryeministri kërkon dialog.
Ndërsa nesër pritet të jetë dita e 13-të e protestës, mësohet axhenda që do të ndjekin studentët dhe njëherësh mund të mësoni rrugët që do të jenë të bllokuara.
Sipas një njoftimi të shpërndarë në rrjetet sociale, protesta e tyre do të nisë në orën 9:00, por ende nuk dihet nëse në ata do ta kalojnë natën para godinës së Kryeministrisë, siç kanë vepruar për disa ditë radhazi.
“Nesër, 17 dhjetor protesta vazhdon në Fakultete (9:00-11:00) dhe më pas para Kryeministrisë. Në orën 9:00-11:00 organizohemi përpara fakulteteve për të ndërgjegjësuar çdonjërin nga ne mbi kauzën tonë të drejtë. Studentët të pajisur me foni do të shpalosin në detaje kërkesat e tyre specifike për arsim cilësor. Folës të ndryshëm nga të gjitha programet e studimit dalin dhe denoncojnë me forcë problemet tona, padrejtësinë që na bëhen përditë, të cilat duhet të marrin fund. Studentët artikulojne kërkesa specifike për autoritetet drejtuese të Fakulteteve/Universiteteve. Përfaqësues nga fakultete/Universitete të tjera përshëndesin protestën dhe prezantojnë problemet e përbashkëta”, shkruhet në njoftimin për protestën e ditës së 13-të.
