σÇmimi i lartë i naftës ka ngritur të gjithë shqiptarët në këmbë për të protestuar për uljen e çmimit të naftës. Në protestë janë ngritur edhe studentët e UBT-së.
Protestës së tyre u janë bashkuar dhe qytetarët të cilët brohorasin njëzëri: Duam vetëm bukë!
Studentët kanë më shumë se dy orë që janë nisur nga ‘Rrethrrotullimi i Kamzës’ drejt Bashkisë së Tiranës në shenjë proteste kundër rritjes rekord të çmimeve në vend.
“Në 2018 ishim ngelësa, tani jemi pabukësa?!”-ishte një thirrje tjetër ‘pikante’ e këtij marshimi, teksa kanë mbërritur në sheshin ‘Skënderbej’.
Kujtojmë se sot në orën 17:00 është thirrur sërish protesta kundër rritjes së çmimeve, duke shënuar kështu ditën e tretë që qytetarët mbushin sheshin “Nënë Tereza” me thirrjet e tyre për uljen e taksave.
Nga protestat e djeshme masive, jo vetëm në Tiranë por dhe në qytetet e tjera të vendit, policia ka prangosur 30 protestues ndërsa janë vënë nën hetim 95 të tjerë.
Konkretisht, Shqipëria bën pjesë në 25 shtetet me çmimin më lartë të naftës në botë, rankuar më shtrenjtë se vende me nivel të lartë jetesë si Gjermania, Spanja, Luksemburgu, Austria dhe Hungaria. Sipas të dhënave, 5 vendet me çmimin më të ulët janë Venezuela, Irani, Arabia Saudite, Siria dhe Angola, të cilat konsiderohen si vende prodhuese të naftës ndërsa vendi me çmimin më të lartë është Hong Kong me 222.58 Lekë/liter, ndjekur më pas nga Suedia me 209.04 Lekë/litër, Izraeli me 199.9 Lekë/litër dhe Mbretëria e Bashkuar me 194.49 Lekë/litër.
