Në vendin tonë sot pritet të zbresë avioni i parë me emigrantët të cilët janë të detyruar të largohen nga vendi i tyre, pasi u pushtua nga talebanët. Tre godina në Qytetin Studenti janë zbrazur nga studentët dhe janë bërë gati për qëndrimin e të huajve dhe familjeve të tyre.
Janë gjithsej 250 emigrantë afganë të cilët pritet të akomodohen në këto ambiente.
Një vendim i tillë i marrë nga qeveria ka shkaktuar shumë debate dhe përplasje mes studentëve dhee personave përgjegjës të konvikteve të cilët ishin regjistruar për t’u akomoduar në ambientet e konvikteve të QS-së.
Sipas përgjegjëses së konvikteve, afganët do të qëndrojnë vetëm dy javë në vendin tonë dhe në këto godina, më pas hapësirat do të jenë sërish të disponueshme për studentët që vijnë në kryeqytet për të nisur vitin akademik.
Sipas marrëveshjes së bërë nga qeveria shqiptare është specifikuar që në vendin tonë do të pranohen vetëm ata që kanë qenë bashkëpunëtorë të aleancës NATO-SHBA, ose gra aktiviste dhe intelektualë. Kostoja për qëndrimin e tyre në Shqipëri pritet të përballohet nga NATO.
Përveç afganëve në vendin tonë pritet të mbërrijë edhe një shqiptare. Ana, 36 vjeç ka ngecur në Kabulin e pushtuar nga talebanët dhe Shqipëria ka nisur një operacion për evakuimin e saj.
