Presidentja e Kosovës, Vjosa Osmani ditën e sotme është takuar me përfaqësuesit e tri organizatave të Kombeve të Bashkuara, ku ka diskutuar në lidhje me përgatitjet që po bën Kosova për të strehuar qytetarët nga Afganistani.
Gjatë takimit me koordinatoren e Kombeve të Bashkuara për zhvillim, Ulrika Richardson, Erol Arduc nga Agjencia për Refugjatë (UNHCR) dhe Anna Rostocka nga Organizata Ndërkombëtare për Migrim (IOM), Osmani është shprehur se strehimi i shtetasve afganë po bëhet në bashkëpunim me SHBA-në.
“Ne jemi të hapur për t’i mirëpritur qytetarët nga Afganistani sepse askush më mirë se ne nuk e njeh dhimbjen e tyre. Për më tepër këtë po e bëjmë bashkë me aleatin tonë strategjik SHBA-në”, tha Osmani, thuhet në një njoftim të lëshuar nga Presidenca.
Po ashtu autoritet në Kosovës kanë shprehur gatishmërinë për të strehuar afganët, pasi talebanët morën kontrollin e Afganistanit. Autoritet nuk kanë bërë me dije se sa është numri i afganëve që të strehohen përkohësisht ose kur ata do të arrijnë në Kosovë.
Kujtojmë se edhe Shqipëria dhe Maqedonia e Veriut kanë shprehur gatishmërinë e tyre për pranimin e afganëve. Të premten, në Shkup, pritet të arrijë grupi i parë i 450 afganëve që autoritetet maqedonase do të strehojnë. Tirana zyrtare ka bërë të ditur se do të strehojë rreth 1.000 afganë, por ende është e paqartë se kur ata do të arrijnë në Shqipëri.
Më 15 gusht, talebanët morën kontrollin e Kabulit dhe thanë se së shpejti do të formojnë një qeveri gjithëpërfshirëse, të bazuar në parimet islame. Mijëra afganë janë dyndur në aeroportin e Kabulit, për t’u larguar sa më parë nga vendi i tyre.
