Në teatrin e ri parazgjedhor të Edi Ramës, skena është ndarë mes tragjedisë dhe komedisë. Mes duartrokitjeve të studentëve patronazhistë, kryeministri kërcen si mjeshtër cirku duke shpërndarë premtime, ndërsa pas kuintave, SPAK-u është shndërruar në kukull që lëviz vetëm kur i tërheq fijet.
“Bursa më të larta se kurrë!” – ulërin mjeshtri i propagandës. Por realiteti është një përbindësh që nuk mund ta fshehësh dot pas perdeve të propagandës – 47% e shqiptarëve mezi dinë të lexojnë. Ja pra, “suksesi” i arsimit shqiptar nën drejtimin e qeverisë Rama!
Ndërsa studentët kukulla duartrokasin çdo fjalë të tij, kryeministri shpërndan me një drorë “karamele” elektorale, me tjetrën mban peng SPAK-un që të mos prekë momentalisht Erion Veliajn, kryebashkiakun që ka kthyer Tiranën në një bankomat personal.
Statistikat janë një grusht në fytyrë të propagandës – vetëm 18.1% e shqiptarëve kanë arritje të larta arsimore. Por kujt i bën përshtypje kjo kur kemi kryeministrin që shpik realitetin e tij paralel? Një realitet ku “e ardhmja europiane” matet me duartrokitjet e studentëve patronazhistë, jo me fakte alarmante të ETF-së.
Me arrogancën e një sunduesi mesjetar, Rama mburret se SPAK është krijesa e tij, jo e Amerikës. Dhe si çdo krijues xheloz, e përdor krijimin e tij si thikë ndaj kundërshtarëve politikë, duke i dhënë urdhra publike për të arrestuar opozitarët. Herë pas here hedh për “skrap” edhe nga njerëzit e tij – ata që pasi i ka përdorur për afera korruptive, i braktis duke i hedhur para SPAK-ut si mish për top.
Mediat e shitura, të shndërruara në megafonë të propagandës, transmetojnë fushatën elektorale të mashtrimeve. Por asnjë fjalë për 35.2% të shqiptarëve që kanë vetëm njohuri mesatare. Asnjë pyetje për presionin mbi SPAK. Asnjë hetim për kryebashkiakun që vazhdon të ecë i lirë përballë malit të provave për korrupsion.
Popullsia plaket, rajonet zbrazen, shkollat mbyllen dhe universitetet prodhojnë diploma pa vlerë. Por këto janë thjesht detaje të parëndësishme në syrin e një regjisori që kërkon vetëm të ruajë pushtetin me çdo kusht në zgjedhjet e majit.
“Shqipëria europiane” e Ramës është kthyer në një shtet ku si arsimi ashtu edhe drejtësia janë instrumente në duart e një regjisori. Një vend ku gjysma e popullsisë mezi lexon dhe ku SPAK-u është shndërruar në një roje personale të të korruptuarve të pushtetit.
Maji po afron dhe me të vjen momenti kur shqiptarët do të vendosin – të jenë pjesë e këtij cirku të turpshëm, apo të kërkojnë më në fund një shfaqje të re, ku drejtësia nuk është kukull dhe arsimi nuk është propagandë. Një shfaqje ku protagonist është qytetari, jo regjisori-kryeministër që kërkon të mbajë peng një komb të tërë për pushtetin e tij!
/gazetareforma.com
