Anëtarët e opozitës në Komisionin Hetimor për Sterilizimin kanë paraqitur një dokument ku kërkojnë këtë të mërkurë të dëshmojnë Kryeministri Edi Rama, i cili ka firmosur Vendimin e Këshillit të Ministrave (VKM) për dhënien me koncesion të shërbimeve të sterilizimit.
Ata theksojnë se Rama ka mbështetur dhe promovuar këto koncesione, madje edhe pas nisjes së hetimeve penale nga organet e drejtësisë.
Në dokumentin e paraqitur, opozita kërkon gjithashtu thirrjen si dëshmitare të zonjës Vilma Nushi, e cila është pronare e dy kompanive përfituese nga një prej koncesioneve që janë subjekt i hetimeve nga ky Komision.
Deputetët kërkojnë që znj. Nushi të paraqitet për të sqaruar përfitimet e saj, që arrijnë deri në 1.5 milion euro nga dividenti i këtyre kontratave.
Refuzimi i përsëritur nga anëtarët e mazhorancës për të thirrur si dëshmitarë Edi Ramën dhe Vilma Nushin, sipas opozitës, është në kundërshtim me Vendimin e Gjykatës Kushtetuese lidhur me Ligjin për Komisionet Hetimore, si dhe me ligjet në fuqi që rregullojnë funksionimin e këtyre komisioneve.
Komisioni është i detyruar që të thërrasë për të dëshmuar para tij, jo vetëm Z. Edi Rama por të gjithë personat për të cilët anëtarët e opozitës, si inicues të këtij Komisioni, kanë kërkuar që të paraqiten e të dëshmojnë”, thuhet në dokumentet e publikuara.
