Ish-ministri i Shëndetësisë, Ilir Beqaj i cili është marrë i pandehur për dosjen e Sterilizimit, ka dalë pas disa orësh nga ambientet e SPAK.
Mësohet se arsyeja e qëndrimit të gjatë brenda ambjenteve të Prokurorisë së Posaçme, ka qenë leximi i 700 fashikujve të dosjes së tij.
Kjo, pasi Beqaj nuk ka pranuar që të marrë dosjen që SPAK po e bën gati ta dorëzojë në GJKKO.
Avokati i tij tha për mediat se pagesa prej 1.2 milionë lekësh është faturë e kripur. Ai shtoi se situata është skandaloze dhe absurde.
Lidhur me këto deklarata të avokatit, ka folur dhe vetë Beqaj pasi doli nga SPAK.
“Fatura për ta pasur dosjen me vete është e kripur. Unë dhe avokati pamë vetëm 15 fashikuj të dosjes. Dosja është voluminoze, por ligji lejon vetëm 10 ditë për ta parë. Në vazhdim të të drejtave që kemi, kemi paraqitur memot, kemi bërë kërkesa për veprime shtesë hetimore dhe gjithashtu kemi bërë kërkesë që unë të jap deklarimet e mia dhe të pyetem sërish nga hetuesit”, tha ish-ministri.
Beqaj dhe avokatët e tij do të duhet të njihen me aktet dhe e premtja është dita e fundit kur mund të dorëzojnë pretendimet për hetimet e prokurorisë përpara se dosja të paraqitet në GJKKO, për të nisur hetimet.
