Ka nisur në territorin shqiptar stërvitja ndërkombëtare “Defender Europe 25”, një nga operacionet më të mëdha dhe më komplekse ushtarake të dhjetëvjeçarit të fundit në Evropë dhe Afrikë.
E organizuar nga Komanda Evropiane e Shteteve të Bashkuara, në bashkëpunim me aleatët e NATO-s dhe partnerë strategjikë, manovrat do të zgjasin deri më 9 qershor 2025.
Në orët e para të mëngjesit të së martës, trupa të Forcës Tokësore shqiptare u nisën nga baza e Zall-Herrit drejt Qendrës së Stërvitjes në Bizë, ku do të zhvillohen fazat më dinamike dhe sfiduese të ushtrimit.
Pjesë e skenarëve janë operacione sulmuese, mbrojtëse dhe lëvizje strategjike në kushte të vështira terreni.
Ministri i Mbrojtjes, Pirro Vengu, shpërndau në rrjetet sociale pamje nga momenti i nisjes së trupave, duke theksuar rëndësinë e këtij angazhimi ushtarak:
“Nga Zall-Herri, ku në orët e para të mëngjesit, trupat e Forcës Tokësore janë nisur drejt Bizës për të filluar zyrtarisht ‘Defender Europe 25’ – një nga stërvitjet më të mëdha dhe më komplekse të dekadës së fundit në Evropë dhe Afrikë.”
