Situata e pandemisë në vendin tonë vazhdon të mbetet e rëndë, teksa prej ditësh shifrat e të infektuarve i tejkalojnë 1 mijë raset brenda 24 orësh. Më parë Gazeta Reforma kishte raportuar se spitalet COVID ishin në skajin e kapaciteteve dhe se shihej si mundësi hapja e spitaleve COVID nëpër rrethe. Një gjë të tillë e ka konfirmuar edhe ministrja e shëndetësisë, Ogerta Manastirliu ditën e sotme në parlament. Ajo ka thënë se ditën e djeshme janë arritur më shumë se 500 të shtruar në 4 spitalet COVID, duke plotësuar gjithë numrin e shtretërve. Manastriliu konfirmoi se nga sot do të aktivizohen spitalet e rretheve duke nisur nga Durrësi e nga Shkodra. Në vijim do të hapen edhe spitalet e Vlorës, Elbasanit dhe Korçës.
“Dje kemi arritur më shumë se 500 të shtruar në 4 spitalet COVID. Do aktivizojmë nga sot, spitalet rajonale. nisim me Durrësin e Shkodrën. Dhe më tej me Vlorën, Korçën dhe Elbasanin. Më pas vijojmë në skenarët e tjerë.”, ka thënë ministrja.
Gjendja paraqitet mjaft e rëndë, teksa ditën e djeshme janë regjistruar 1088 raste të reja dhe 12 viktima. Deri tani asnjë zyrtar i qeverisë nuk e ka pranuar kolapsin në shëndetësi edhe pse spitalet nuk kanë më kapacitete. Në një situatë të tillë natyrshëm lind pyetja nëse spitalet e rretheve do të kenë mundësitë që të përballojnë edhe trajtimin e pacientëve me COVID nisur edhe nga kushtet e vështira në të cilat nodhen si pasojë e mungesës së investimeve. Ndërkohë, masat kufizuese vazhdojnë në vendin tonë dhe në fuqi qëndron pra policore që prej 20:00 të mbrëmjes e deri në 06:00 të mëngjesit.
