Kryetarja e Kuvendit, Elisa Spiropali, ka reaguar pas publikimit të Opinionit të Komisionit të Venecias në lidhje me mandatin e deputetes socialiste Olta Xhaçka.
Spiropali theksoi se ky opinion ka sqaruar të gjitha akuzat dhe shpifjet kundër qëndrimit të Kuvendit, duke theksuar se qëndrimi i Kuvendit për trajtimin e mandatit të Xhaçkës nuk ka qenë as politik, as partiak, por një qëndrim kushtetues, që lidhet me sovranitetin e Kuvendit.
Ajo shtoi se vendimi i Gjykatës Kushtetuese, i cili kërkon një mënyrë të caktuar votimi për deputetët, është i papranueshëm, pasi do të ndikonte në pavarësinë e Kuvendit dhe në lirinë e deputetëve për të votuar.
Spiropali shprehu falënderimin për Komisionin e Venecias për shqyrtimin e shpejtë dhe të kujdesshëm të kërkesës së saj, duke besuar se ky opinion do të ndihmojë të gjitha palët dhe institucionet për të reflektuar në lidhje me çështjet e papajtueshmërisë së mandatit të deputetëve në të ardhmen.
Në opinionin e Komisionit të Venecias, nuk është dhënë një qëndrim të drejtpërdrejtë për rastin konkret të Xhaçkës, por është ofruar një analizë mbi mënyrën se si duhet trajtuar çështja e papajtueshmërisë së mandatit në kuadrin kushtetues shqiptar.
Komisioni ka theksuar se Parlamenti duhet të respektojë vendimet e Gjykatës Kushtetuese dhe t’i zbatojë ato pa e kushtëzuar këtë me vullnetin e shumicës parlamentare.
