Gjatë një fjalimi në një stadium në Athinë, ministrja e Shtetit për Marrëdhëniet me Parlamentin, Elisa Spiropali, rifreskoi kujtimet e ngrohta mes Shqipërisë dhe Greqisë. Ajo tha, “Sa herë vë këmbën në Greqi më vjen në mendje kur perdet e komunizmit ranë. Atëherë Greqia, fqinji ynë shekullor, u shfaq si një mik fisnik. Krah grekësh fisnikë ndanë me ne bukë e kripë.”
Spiropali vazhdoi të përshkruajë sfidat dhe tensionet e kaluara, por theksoi se marrëdhëniet mes dy vendeve janë forcuar pavarësisht sfidave. “Fërkime dhe keqkuptime, mëri të vjetra në kufirin dikur të heshtur mes dy vendeve nisën të riluajnë si në një pllakë gramafoni kërcitje të forta. Sot ajo pllakë gramafoni vazhdon të rrotullohet, por kërcitjet e gjilpërës së gramafonit nuk i kalojnë dot korridoret e politikës së ditës,” u shpreh ajo, duke nënvizuar se pavarësisht sfidave të mëdha, Shqipëria ka bërë hapa të mëdhenj përpara. “Ju e keni bërë Shqipërinë më të madhe dhe më të fortë,” përfundoi ajo, duke vlerësuar ndikimin pozitiv të mbështetjes greke.
