Ndeshja Spanjë-Kosovë do të jetë një sfidë më vete për komentatorët e ndeshjes, gazetarët dhe televizionin që do e transmetojë. Prestigjiozja “Marca” shkruan se komentatorëve të futbollit në Spanjë iu është ndaluar që rivalit t’i referohen me emrin Kosova.
Spanja nuk njeh pavarësinë e Kosovës dhe çështjet diplomatike duket se kanë ndërhyrë fuqimisht edhe në sport pavarësisht se sfida do të luhet. Po ashtu, televizioni publik që do e transmetojë sfidën, do të bëjë disa modifikime në mënyrë që të mos shfaqet në asnjë moment flamuri i Kosovës apo të dëgjohet himni i saj.
Federata Spanjolle e Futbollit gjithsesi, e ka njohur Kosovën si rival dhe flamuri i saj, nga dje valëvitet mbi stadiumin Olimpik të Seviljës. Problemet mes Kosovës dhe gazetarëve spanjollë kanë nisur që në ditën e djeshme në fakt.
Në konferencën për shtyp të trajnerit të Kosovës, Benard Challandes, një gazetar nuk preferoi të përmendë emrin e Kosovës. Zëdhënësi për shtyp i FFK-së (Federatës së Futbollit në Kosovë), i kërkoi gazetarit të përmendë emrin e Kosovës, ose në të kundërt trajneri nuk do të përgjigjet.
Pas disa sekondash debat, gazetari spanjoll u dorëzua dhe iu referua Challandesit si trajneri i Kosovës. Vetëm pasi u përmend emri i përfaqësueses së Kosovës, zëdhënësi për shtyp i FFK-së, e lejoi strategun zviceran të përgjigjej.
