Spanja sërish në mbrojtje të pasagjerëve, ndërsa Shqipëria hesht përballë shkeljeve të vazhdueshme të Wizz Air. Në vendin tonë, qytetarët përballen çdo ditë me vonesa, anulime të papritura, tarifa të fryra për bagazhet, kosto bagazhesh që rriten gjatë udhëtimit, mungesë informacioni dhe sorollatje të vazhdueshme, por asnjë institucion nuk merr masa. Shqipëria, ndryshe nga vendet e Bashkimit Evropian, vijon të mos ketë asnjë mekanizëm real për të mbrojtur konsumatorët në sektorin ajror.
Ndërkohë, Spanja ka ndërmarrë një hap të fortë ligjor. Ministri spanjoll i të Drejtave Sociale, Çështjeve të Konsumatorit dhe Axhendës 2030, Paolo Bustinduy, deklaroi këtë të mërkurë në Bruksel se qeveria iberike do të sanksionojë edhe Wizz Air dhe Transavia për tarifimin e bagazheve të dorës, duke ndjekur shembullin e ndëshkimit të mëparshëm ndaj Ryanair, Vueling, EasyJet, Norwegian dhe Volotea. Për këto pesë kompani, Spanja ka vendosur gjoba totale në vlerën e 179 milionë eurove.
“Këto dy kompani të tjera po ndjekin të njëjtën rrugë si pesë të mëparshmet,” deklaroi Bustinduy, i cituar nga televizionet spanjolle, gjatë një takimi në selinë e Organizatës Evropiane të Konsumatorëve (BEUC). Në këtë takim u bë publike dhe një ankesë e re ndaj shtatë kompanive ajrore — EasyJet, Norwegian Airlines, Ryanair, Transavia, Volotea, Vueling dhe Wizz Air — drejtuar Komisionit Evropian dhe Rrjetit Evropian të Konsumatorëve.
Autoritetet spanjolle i kanë cilësuar tarifat për bagazhet e dorës dhe shërbime të tjera bazike si “abuzive” dhe “praktika të paligjshme”, duke përfshirë edhe pagesën për printimin e kartës së imbarkimit. Kjo fushatë ndëshkimore, sipas ministrit, është pjesë e përpjekjeve të qeverisë për të siguruar respektimin e të drejtave të konsumatorëve.
Por ndërsa vendet e BE-së veprojnë, Shqipëria vijon të qëndrojë në vendnumëro. Wizz Air ka qenë vazhdimisht subjekt i ankesave nga qytetarët shqiptarë, të cilët raportojnë për vonesa sistematike në çdo fluturim, anulime biletash pa njoftim, rishitje me çmime më të larta dhe mungesë totale transparence. Gazeta Reforma ka denoncuar në mënyrë të përsëritur skandalet dhe abuzimet që kjo kompani ushtron ndaj qytetarëve shqiptarë, por asnjë autoritet nuk ka ndërmarrë asnjë masë serioze.
Është e papranueshme që një kompani, e cila operon çdo ditë në Shqipëri dhe përfiton nga tregu vendas, të vijojë të shkelë të drejtat e pasagjerëve pa u ndëshkuar. Shqipëria ka nevojë për një autoritet të vërtetë mbrojtës të konsumatorëve, që nuk mbyll sytë përballë abuzimeve, por vepron, ashtu si Spanja dhe çdo vend tjetër, për qytetarët e vet.
