Kur SPAK zbarkoi me urdhër kontrolli në Bashkinë Klos, duke sekuestruar telefonat e zyrtarëve, duke marrë në pyetje policë dhe duke shoqëruar disa prej tyre për dyshimet e shitblerjes së votës, kushdo do të kishte pritur që fituesi i zgjedhjeve lokale në këtë qendër të varfër të përballej me pasojat e krimeve zgjedhore.
Përkundrazi, Agron Malaj, i shpallur triumfues me 12 616 vota të dyshimta, jo vetëm që kapërceu rrjetën hetimore, por tani futet në Parlament si një prej dhjetë kandidatëve më të votuar të Partisë Socialiste, një “dhjetësh” që përfshin emra si Blendi Gonxhja, Erion Braçe, Arkend Balla, Ervin Hoxha, Sara Mila, Ceno Klosi, Klevis Jahaj, Ani Dyrmishi e Fatmir Xhafaj, dhjetëshja e krye-hajdutëve më të mëdhenj, me fitore të bazuar në vota të vjedhura.
Operacioni i SPAK që nisi në orët e para të mëngjesit përfshiu shpërndarjen e urdhrave të kontrollit në zyrat publike dhe private: nga kabineti i kryebashkiakut të Klosit dhe automjetet e funksionarëve, deri te telefonat celularë ku dyshohet të jenë fiksuar prova të koordinimit të shitblerjes.
Agron Malaj njihet si një emër problematik. Ish-gardisti i Gardës së Republikës në ngjarjet e 21 Janarit 2011, i dënuar në 1999 për armëmbajtje pa leje dhe plagosje; dënim që u mbyll pas “tërheqjes” misterioze të dëshmitarëve, u shpërblye nën hijen e Edi Ramës: së pari si Drejtor Rajonal i OSHEE-së për zonën veriore, pastaj si kryetar bashkie në Mat në 2019, dhe më në fund si kandidat për deputet në listën monopartiake të majit 2025.
Pasuria e Malajt ngrihet mbi një rrjet kompleks korruptiv: kompania “Global Security”, e themeluar me partnerë në vitin 2007 kur ai ende shërbente në Gardë, ka përfituar mbi 40 milionë euro tendera pa garë, fatura fiktive nga “Krist-Al Construction” për skemat e inceneratorëve, manipulim TVSH-je, dhe një seri transaksionesh financiare që shpjegojnë blerjen e pasurive të paluajtshme luksoze në Tiranë, Elbasan e Farkë. Ndërkohë, në Dhërmi, vëllai i tij Fatos Malaj është ortak në hotelin “La Brisa”, ndërsa në Mat, rruga e re elektorale përfundon tek hidrocentrali i vëllait të tij, një investim me kontrata koncesioni të dyshimta.
Ky rast në Klos tregon se sistemi i drejtësisë zgjedhore shërben për t’i fuqizuar ata që shkelin ligjin, jo për t’i ndëshkuar. SPAK, në vend që të ndalojë krimin, ka aktivizuar vetëm fazën fillestare të hetimit; emrat e tjerë mbeten në hije dhe përveç sekuestrimit të telefonave dhe shoqërimeve, kërkojmë përgjegjësi reale: bllokim mandate, pranga e konfiskim pasurie. Në mungesë të këtij akti rrënjësor, çdo tentativë për të riparuar besimin qytetar te vota mbetet vetëm retorikë.
Në një vend ku vota e grabitur shndërrohet në pushtet dhe ku kriminelët zgjedhorë shpërblehen me mandate, sistemi demokratik është goditur në themel. SPAK duhet të ndjekë deri në fund secilën pistë hetimi dhe të rikthejë një mesazh të qartë: për çdo votë të vjedhur, ka pasoja drastike. Përndryshe, shqiptarët do të kujtojnë për shumë kohë se në Shqipëri krimi zgjedhor është rrugë drejt privilegjeve, jo drejt ndëshkimit.
