SPAK ka autorizuar përgjimin e Gjykatës Kushtetuese në lidhje me vendimin për ligjshmërinë e përdorimit të përgjimeve të SKY ECC si prova në proceset gjyqësore.
Ky vendim lidhet me padinë e ngritur nga i hetuari Pëllumb Gjoka, i cili ka kërkuar të shfuqizohet përdorimi i këtyre provave.
Sipas dokumentit të publikuar në emisionin ‘Çim Peka LIVE’, autoritetet dyshojnë se ndaj gjyqtarëve të Gjykatës Kushtetuese është ushtruar ndikim, në këmbim të përfitimeve të paligjshme.
Në dokument thuhet se, pavarësisht kalimit të më shumë se 30 ditëve nga shqyrtimi i kërkesës, ende nuk është njoftuar vendimi përfundimtar i Gjykatës Kushtetuese.
Gjatë kësaj periudhe, disa persona, të cilët mund të kenë interesa për të favorizuar Pëllumb Gjokën, po përpiqen të ndikojnë tek anëtarë të Gjykatës Kushtetuese për të arritur një vendim të favorshëm për të. Ky informacion ka shqetësuar autoritetet, pasi ndërkohë që kërkesa është refuzuar, ka tentativa për të manipuluar vendimin.
Gjoka është arrestuar pas zbërthimit të komunikimeve nga aplikacioni i enkriptuar SKY ECC. Avokatët e tij kanë kërkuar që këto mesazhe të mos përdoren si prova, duke u mbështetur në vendime të ngjashme nga shtete të tjera. Gjykata Kushtetuese e ka refuzuar kërkesën për shfuqizimin e masës “arrest në burg” dhe ka mbështetur përdorimin e provave nga SKY ECC, duke e cilësuar këtë si të ligjshëm.
Gjoka, i akuzuar për disa vepra penale të rënda, ndodhet në paraburgim që nga korriku i vitit 2023. Ai është arrestuar gjatë operacionit “Metamorfoza”, ku janë arrestuar gjithashtu disa zyrtarë të policisë dhe prokurorë, të cilët dyshohet se ishin të përfshirë në aktivitete kriminale. Hetimet mbi këtë grup të strukturuar kriminal vijojnë, ndërkohë që përpjekjet për të ndikuar në vendimmarrjen e Gjykatës Kushtetuese mbeten një shqetësim për SPAK.
