Prokuroria e Posaçme kundër Korrupsionit dhe Krimit të Organizuar ka sekuestruar pasuritë e Ervis Ferizajt dhe Përparim Kalbajt, si pjesë e hetimeve për një grup kriminal që vepronte përmes sistemit informal “Hawala” për transferimin e parave në Shqipëri.
SPAK njoftoi se hetimet në kuadër të procedimit penal nr. 49/3 të vitit 2023 kanë në qendër veprat penale “Prodhimi dhe shitja e narkotikëve”, “Trafiku i narkotikëve”, “Pastrimi i produkteve të veprës penale apo i veprimtarisë kriminale”, si dhe “Grupi i strukturuar kriminal” dhe “Kryerja e veprave nga grupi i strukturuar kriminal”, të parashikuara nga nenet 28/4, 283/1, 283/a, 287, 333/a/2 dhe 334/1 të Kodit Penal.
Në fokus të hetimeve janë shtetasit E.F., B.F. dhe P.K. Gjatë fazës paraprake janë kryer verifikime për burimet e pasurive në pronësi të këtyre individëve, me qëllim sekuestrimin e çdo aktivi që dyshohet të jetë produkt i aktivitetit kriminal.
Me kërkesë të Prokurorisë së Posaçme, Gjykata e Posaçme e Shkallës së Parë për Korrupsionin dhe Krimin e Organizuar ka vendosur më 14 korrik 2024 vendimin nr. 442, për caktimin e masës së sigurimit pasuror “sekuestro preventive” ndaj pasurive të mëposhtme në pronësi direkte dhe indirekte të shtetasit E.F.:
- Shoqëria tregtare “Ferizaj-78” sh.p.k, me seli në rrugën “Muhamet Gjollesha”, Tiranë, përfshirë të gjitha asetet e saj;
- Njësi me sipërfaqe 161.67 m², me vlerë kontraktuale 200,000 euro, e regjistruar në emër të E.F.;
- Vilë dykatëshe në Lalëz, Durrës, me sipërfaqe trualli 162.85 m² dhe ndërtimi 140 m², përfituar me kontratë të datës 19 dhjetor 2019, me vlerë 80,000 euro;
- Shuma monetare prej 77,160 frangash zvicerane.
Ndërkohë, për shtetasin P.K. është vendosur sekuestrimi preventiv i pasurive në zotërim indirekt:
- Shoqëria tregtare “Kalbaj” sh.p.k, me të gjitha pasuritë e luajtshme dhe të paluajtshme që i përkasin kësaj kompanie.
SPAK bëri me dije se nga kontrollet në ambientet e shoqërisë “Ferizaj-78” sh.p.k dhe në banesa janë sekuestruar sende dhe shuma monetare në vlerën totale prej rreth 68 milionë lekësh, që dyshohen si të ardhura nga veprimtari kriminale. Hetimet për këtë çështje vijojnë.
