Prokuroria e Posaçme ka sekuestruar pamjet e sigurisë në Bllokun e Sigurisë, pas arrestimit të shefit të Qarkullimit Rrugor të Tiranës, Roven Zeka.
Sekuestrimi është kryer për shkak të dyshimeve se disa zyrtarë policie kanë pasur kontakte me Zekën.
Burime konfirmojnë se kontaktet me Zekën janë realizuar nga një drejtor policie dhe tre shefa komisariati. Po ashtu, është sekuestruar edhe celulari i një biznesmeni të lidhur me këtë çështje.
Roven Zeka u arrestua më 19 prill nga SPAK, së bashku me oficerin e Policisë Gjyqësore Edison Tabaku dhe shefin e Sektorit të Aksidenteve, Sokol Novak.
Ata akuzohen për korrupsion, pasi dyshohet se kanë marrë para nga një biznesmen për të mbyllur në favor një aksident rrugor të ndodhur më 16 prill, ku si pasojë e përplasjes së dy automjeteve, pesë persona përfunduan në spital.
Gjatë seancës në Gjykatën e Posaçme më 22 prill, Zeka është shprehur se është oficer karriere në Policinë e Shtetit. Ndërsa për Sokol Novakun, gjykata refuzoi kërkesën për një masë më të butë sigurie, pavarësisht pretendimeve të tij për rrethana familjare.
Dy shefat e Rrugores kanë deklaruar se kanë zbatuar procedurat standarde duke referuar materialet në prokurori dhe kanë mohuar përfshirjen në veprimet e Edison Tabakut.
Në urdhrin e ndalimit, prokurorja Elida Kaçkini saktëson se të tre efektivët janë transferuar në Tiranë nga strukturat e Policisë së Elbasanit, ku kishin shërbyer më parë.
Hetimet kanë zbuluar se Edison Tabaku kishte njohje me biznesmenin E.V., bashkëshortja e të cilit ishte përgjegjëse për aksidentin.
Tabaku është takuar dy herë me E.V., me qëllim marrjen e një shumë prej 2 mijë eurosh për ta ndarë me dy eprorët e tij. Përgjimet e SPAK dokumentojnë komunikimet dhe marrëveshjet për mbylljen e çështjes.
Aktualisht, autoritetet nuk kanë dhënë detaje mbi gjendjen e pesë personave të plagosur në aksidentin e ndodhur më 16 prill.
