Sali Berisha nuk do marrë pjesë në seancat plenare në Parlament.
Pas kërkesës së bërë nga avokatët e Berishës, që ish-kryeministri të marrë pjesë në Kuvend edhe pse është në “arrest shtëpie”, ka ardhur përgjigja e SPAK.
Përmes një njoftimi publik, SPAK është shprehur se kjo kërkesë nuk është pranuar nga prokurorët dhe si rrjedhojë Berisha duhet të respektojë masën e vendosur nga GJKKO.
Kërkesa për të marrë pjesë në Kuvend u bë nga dy avokatët e Berishës u bë më 15 janar, ndërsa është argumentuar me faktin se Sali Berisha prezumohet i pafajshëm, se ka të drejtë të marrë pjesë në seancat plenare, por edhe detyrim karshi zgjedhësve të tij. Nëse SPAK i rri këtij vendimi, i bie që Berisha të rrezikojë edhe mandatin e deputetit, pasi sipas ligjit nëse një deputet nuk paraqitet për 6 muaj rresht në Kuvend, humb mandatin e tij. Gjithësesi kjo mbetet për tu parë në vazhdim.
NJOFTIMI I SPAK:
Personi nën hetim Sali Berisha(i përfaqësuar nga mbrojtësit e tij Sokol Mëngjesi dhe Genci Gjokutaj) ka depozituar në datën 15.01.2024 një kërkesë me anën e së cilës kërkonte lejimin e tij për të marrë pjesë në seancat plenare të Kuvendit, në cilësinë e deputetit. Pasi janë njohur me përmbajtjen e kësaj kërkese, me vendimin e datës 18.01.2024 Prokurorët kanë vendosur mospranimin e saj.
