Prokuroria e Posaçme Kundër Korrupsionit dhe Krimit të Organizuar ka përfunduar hetimet dhe ka dorëzuar në Gjykatën e Posaçme dosjen ndaj pesë të pandehurve të përfshirë në një skemë blerjeje votash gjatë zgjedhjeve vendore të vitit 2023 në Bashkinë e Rrogozhinës.
Sipas SPAK, në qendër të hetimit janë shtetasit Limon Shala, Fatmir Thaçi, Florant Saraçi dhe Engjell Cara, të cilët akuzohen për “korrupsion aktiv në zgjedhje” në bashkëpunim dhe në mënyrë të përsëritur.
Ndërsa Shkëlqim Hoxha, ish-kandidati i Partisë Demokratike për Bashkinë e Rrogozhinës, akuzohet për “moskallëzim të krimit”, pasi ka qenë në dijeni të kësaj veprimtarie të paligjshme dhe nuk e ka raportuar pranë autoriteteve.
Nga hetimet ka rezultuar se të pandehurit kanë siguruar dhe shpërndarë bileta udhëtimi për të paktën 64 shtetas, me qëllim që këta të ktheheshin nga jashtë vendit për të votuar në favor të Shkëlqim Hoxhës. Këto raste janë dokumentuar në mënyrë të plotë nga prokuroria, e cila thekson se Hoxha kishte dijeni për përfshirjen e bashkëpunëtorëve të tij në këtë skemë, por nuk ka njoftuar asnjë institucion.
Fillimisht, çështja u hetua nga Prokuroria e Durrësit dhe Policia Lokale, por më pas iu kalua SPAK-ut për shkak të natyrës së veprës penale. Dy procedimet e ndara, përkatësisht me numër 161/2023 dhe 162/2023, u bashkuan në një çështje të vetme për shkak të përputhjes së fakteve dhe personave nën hetim.
Në fund të hetimeve, SPAK ka dorëzuar kërkesën për gjykim në Gjykatën e Posaçme të Shkallës së Parë, duke kërkuar që pesë të pandehurit të përballen me drejtësinë për akuzat që rëndojnë ndaj tyre.
Kujtojmë se zgjedhjet e 14 majit 2023 në Rrogozhinë u shpallën të pavlefshme, duke çuar në përsëritjen e tyre më 23 korrik. Në votimin e dytë, kandidati socialist Edison Memolla fitoi bindshëm ndaj Shkëlqim Hoxhës, me një diferencë prej 1752 votash, në ndryshim nga zgjedhjet e para, ku rezultati ishte ndarë vetëm me 21 vota diferencë. Rezultati final i votimeve të përsëritura ishte 6658 vota për Memollën dhe 4906 për Hoxhën.
